Ryngkat ki riew niam, duwai ka HYC ban beh ia ka khlam COVID-19

Nongpoh:Myn shisngi, ki nongialam ka HYC Raid Nongtung Circle bad ka HYC Mawlasnai Unit, ki la pynlong ia kawei ka prokram Jingduwai ba kyrpang, na ka bynta ban behkrad noh ia kane ka jingpang COVID-19, kaba la sar ia shityllup ka pyrthei bad katno tam eh ba ka jylla ruh ka la shah ktah bad shibun ki paidbah kiba la iakynduh jingeh.
Ki nongialam ka HYC kiba la donlang ha katei ka sngi, ki kynthup ia u Bah Hercules Suting, President ka HYC ha Ri Bhoi, nangta u Fr. Zachaeus Syngkli, Parish Mawlasnai, u Tbn. T.K. Sunar Tymmen Basan Balang Presbyterian, Rangbah Balang Church of God Hamarbamut Rani, Pastor Seventh Day Adventist Church, Rev. P.wahlang, nangta u Bah Joplin Sten, rangbah shnong mawlasnai lem bad shibun kiwei pat.

Lyngba katei ka sngi, la pynsngew ia ki kyntien na ka kot bah bakhuid da u Phadar bad uba la ialam ruh ia ka jingduwai bad kumjuh na ki nongialam Balang bapher bapher, ki ba lah shim bynta ha ka jingduwai kyrpang, na ka bynta ki para shnong ba don ha ka jingpang jingshitom bad kumjuh ia ka jylla hi baroh kawei .

Ha katei kajuh hi ka sngi, ka HYC ka la leit ban noh synniang da ki marbam sha ka Dorbar Shnong Mawlasnai, kaba long kum shi bynta ban ban iarap ia katei ka shnong, khnang ba ka shnong kan lah ban iarap ia kiba shah set slung (quarantine) ha shnong mawlasnai.