Ka iing ka la skhem, ngi la nud ban mih madan:Khlursing rPalat 20 hajar ngut rung dkhot BJP ha ka jylla

Shillong, 12 Iaiong:
U President ka BJP Meghalaya u bah Khlur sing Lyngdoh u la ong ba ka BJP ha kane ka jylla Meghalaya mynta ka la sdang ban khlain na ka jingwan pyniasoh ki paidbah bad ka jing kyrshan jong ki.
“Mynshwa ka party kam pat nud ban mih madan namar ba ka dang tlot hynrei mynta ka la khlain bad ka la dei ka por ba kan mih madan noh”, la ong u President ka BJP u bah Lyngdoh.
U la iathuh ba haduh mynta ka party ka la lah ban pynrung dkhot haduh 20 hajar tam eiei ha kylleng ki jaka jong ka jylla.
Ha ka jingshisha ka party ka la buh thong ban pynrung dkhot haduh 35 hajar haduh u Lber ba la dep, hynrei namar ba kam pat kot ia kane ka thong, ka party ka dang pynkhreh shuh shuh shaid shaid ban pyndep ia kane ka thong.
“Tang kiba la pynpoi ia ka phom jinglong dkhot ki don 20 hajar eiei bad dang don bun ki bym pat pynpoi ia ki phom rung dkhot”, la ong u President bad bynrap, ba hadien ba la ioh lut ia ki phom pynrung dkhot na kylleng ki jaka, la khmih lynti ba ka jingdon jong ki briew ba rung dkhot ha kane ka seng, kan nym duna ia ka thong ba la buh.
U la ong ba nalor ki phom ba la pynkhreh, ki don ruh ki briew kiba rung da ka online bad ia kane ruh ka seng kam pat ioh jingkheiñ namar ka poi beit sha ka ophis sha Delhi.
U president katei ka seng, u la iathuh ba kiba kham bun kiba wan rung dkhot, ki dei na kane ka nongbah bad ki bynta jong ka East Khasi Hills.
Haba kylli ki don ne em ki riew pawkhmat kiba la wan rung ha kane ka party, u Bah Lyngdoh u la iathuh ba ki don bun ki kha heh ne ki riew pawkhmat kiba long ki MLA ne MDC kiba rim bad kiba thymmai ruh kiba la pynap lypa ban wan rung ha ka seng, ynda la dei ka por.
“Ngi kyrmen ba ha ka elekshon ban wan, ka BJP kan sa ioh bun ngut ki MLA ha Meghalaya”, la ong u Bah Lyngdoh.
Hynrei ha kajuh ka por, u la ong ba ka nongrim jong ka BJP ka long ym ban ialeh tang ia ka elekshon hynrei ban ai ia ka jingshakri ia ki paidbah bad ynda ki paidbah ki sngewthuh, kin wan hi ban ai ia ka jingkyrshan.
“Ngi leit sha shnong ban pynlong ia ki jingpynshai paidbah ia ki kam pynroi bad ki skhim bapher bapher ba ki paidbah kin snegwthuh” la ong u President ka BJP.