“PHIKIR BHA IALADE”

Dr. B.R. Marpna

Ka jingphikir ka long kaba donkam bha ia ngi ki briew ha kano kano ka bynta namar lada ngi leh bym suidniew, kan wanrah ia ka jingeh hadien. Lada ngi iakren ia kane ka mat, kin don shibun ki bynta kiba pher bapher bad kiba donkam ban leh. Ngan shu ai nuksa hangne tang ka jingniah ia ki kali. Ki briew haba ki niah ia ki kali kin hap ban antad ia ka jingsted ne ban phikir bha ban lait na ki jingmynsaw. Ki hap ban peit bha khamtam ha ki lad (turning) khnang ban lait na kino kino ki aksiden bad khamtam ban peitbha, hangno ki jaka kiba kham ma bad kiba ju don ki aksiden kiba khah khah. Ki ju don beit ha ki surok ba ki ju thoh, Niah suki (Drive Slowly).

Ka jingim Khristan ruh ka long ka jinghikai ia ngi ba ngi donkam ban husiar bha. Ngim dei ban khein sting ia ka jingiaid lynti jong ngi namar ki don beit ki jingtlot ha u ne ka briew, kiba long ki nongbud jong U Jisu Khrist bad ia kiba kum kita, ngi donkam ban peitngor bha khnang ba ngin nym shah riam ne shah teh ha kita ki jinglong. U Apostol Paul u ong, ngam pat janai hynrei nga beh shaphrang kein. U Soitan u long uba sian bha bad u iohi haei ki jingtlot (weak points) kiba ngi don bad un khyrwait nangta. Ym dei ba pyntieng!!. Hooid, u Samson uba long u Nasar jong U Blei, u shah riam ha ka Delilah, u David, Petros bad kiwei kiwei de ha ka bym poi pyrkhat. Ngi kynmaw ba U Jisu u la thngan hadien ba U la shah jingit bad u Soitan u wan kum ha kata ka por ban pynngop ia U Jisu.

Lok baieid ha U Trai Jisu, to ngin long kiba phikir bad sumar. Peit ialade, haei nga tlot? Kumno ngin sumar ban lait na ki jingriam jong u Soitan bad kumno pat ngin jop ne lait? Te kumta, ka donkam shikatdei ban phikir ne sumar bha ialade. U Paul u kyntu ia Timothi ban sumar bha ialade bad ia la ka kynhun kumjuh. Ha ka shithi jong u sha u I Timothi 4:16 “To sumar shaphang ialade…”