Leit kyrkieh ki stad na Delhi, sha Manipur, Arunachal, Tripura, ba nang kiew stet ka jingpang khlam corona

New Delhi: Ka sorkar India, myn hynnin ka sngi, ka la phah ia ki kynhun bapher jongka sha Kerala, Arunachal Pradesh, Tripura, Odisha, Chhattisgarh bad Manipur, na ka daw jong ka jingkiew stet ka khlam corona ha kitei ki jylla haneng.
Kitei ki kynhun, kin iarap ia ki jylla, ha kaba iadei bad ka jing iakhun jongki pyrshah ia ka khlam corona, ong ka khubor jong ka tnat ka koit ka khiah ka sorkar India.

Katei ka kynhun, kan don ar ngut ki stad bad kitei ki kynthup ia u doktor bad sa uwei u stad ha ka koit ka khiah.
Katei ka kynhun, kan peit ia ki rukom test, ka jing peit ngor ia ka rukom sumar, ki jaka kiba don ha ka jingkhang dam, ka jingdon ki jaka thiah, ki kali kit nongpang, ki ventilator, ki oxygen, ki jingai injek iada covid.

Sha Manipur, yn khlieh da U Dr L Swasticharan, Additional DDG bad U Director EMR; sha Arunachal Pradesh, un leit U Dr Sanjay Sadhukhan, bad U Professor AIIH&PH; sha Tripura, un leit U Dr RN Sinha; sha Kerala, U Dr Ruchi Jain, Public Health Specialist Gr. II, RoHFW; sha Odisha, un leit U Dr.A Dan, Public Health Specialist AIIH&PH bad sha Chhattisgarh, un leit U Dr Dibakar Sahu, Assistant Professor, AIIMS Raipur.