Mar ia pynbna ban plie ia ka Mairang District, dawa sa U James Sangma, ia ka Dadenggre District ha Garo hills

Shillong:U MLA ka Dadenggre Constituency u ba long ruh u myntri ka tnad bording u James P.K Sangma, u la ong ba hadien ba u myntri rangbah u Conrad K Sangma, u la pynbna ban kyntiew ia ka Mairang Sub-Division sha ka District, na ka liang ka party NPP kan sa leit buh biang ia ka dorkhas ban dawa kyntiew ia ka Dadenggre Sub Division sha ka District.

U MLA ka Dadenggre u la iathuh ba ka jingdawa jong ka party NPP ban kyntiew ia ka Dadenggre Sub Division sha ka District, ka dei naduh ba la thaw ia ka sorkar MDA ha ka ba haduh mynta ka dang sah teng bad hadien ba u myntri rangbah u la pynbna ban kyntiew ia ka Mairang Sub Division sha ka District,ka party NPP kan sa rah biang ia kane ka dorkhas bad ka khmih lynti ba u Myntri rangbah un shim khia ia kane ka bynta.

U Sangma u la ong ba ka Dadenggre ka dei ka Sub Division kaba la rim bha na ki Sub Division ki ba don ha Garo Hills,bad ka don ia ki jaka ki ba heh bad ka la dei ka thain ka ba la bun ki nongshong shnong.
“Ka daw ban kyntiew ia ki Sub Division sha ki District ki dei ban don ka jingiatrei ka ba ia jan hapdeng ki nongshong shnong bad ki bor ka District Administration bad kane ka long ka ba donkam ban pynkhlain bad ban iajan ka jingtrei kam” u la ong.

“Ka jingdawa ban kyntiew District ia ka Dadenggre ka dei ka ba la slem bad ka ba don nongrim ha ka ba ngi iohi ba ki sub division ki ioh district wat la kim dei ki sub division ki ba la rim kum ka Dadenggre” u la bynrap. U u la ong ruh na ka liang ka party NPP kan sa leit buh dorkhas biang sha u myntri rangbah ban pynkynmaw ia ka jingdawa ban kyntiew ia ka Dadenggre Sub Division sha ka District.

U myntri u la ong ruh ba um don ka jingsngewdiaw halor ka jingpynbna ban kyntiew ia ka Mairang Sub Division sha ka District, namar ban kyntiew District ia kano kano ka Sub Division kam dei ka rai ka ba suk na ka bynta u Myntri Rangbah.

“Ngin ieh ha ka jingstad jong u Myntri Rangbah ban pyniaid ia kine kam halor ka ne ka bynta hynrei na ka liang ka NPP kan leit buh biang ia ka dorkhas ha u Myntri Rangbah ban dawa ban kyntiew ia ka Dadenggre Sub Division sha ka District” u la bynrap.