Nongpoh:Ki nongialam ka FKJGP ha Ri Bhoi, hynnin ka sngi ki la leit ban khang tala syndon ia kawei ka karkhana pynmih jri u Rohit Kapoor, kaba la tip kum ka Resource Rubber Pvt. Ltd. kaba don haka shnong Mawsmai 11 Mile khappud ka Meghaya-Assam ha Ri-Bhoi District.
Ka nongrim kaba la pynlong ia ki nongialam ka FKJGP ban leit khang tala ia katei ka karkhana, ka dei ba ki la bitar eh hadien ba ki la ioh ia ka jingujor na ki trai, kiba la kynnoh ba katei ka Karkhana u Rohit Kapoor, kam ju siew bai wai satia sha ki trai jaka mynta la bun snem.
Haba iadei bad katei ka jingleit khang tala hynnin ka sngi, ki nongialam ka FKJGP ki la ong, ba ka seng ka la khot ia u Rohit Kapoor ban wan mih, na ka bynta ban iakren halor katei ka kam, hynrei utei u Rohit Kapoor um shym la wan mih satia bad na katei ka jingleh jong u, ka la pynbitar eh ia ki dkhot ka seng bad khamtam eh, haba ki la lap ba katei ka kam lah ban pyni ia ki kot ki sla kiba biang.
Hadien ba la dep ban khang tala ia katei ka karkhana, u Bah Luistar Lyngdoh, President ka FKJGP, u la phah ia ka kyrwoh kaba long kum ka jingmaham tyngeh ia ki bar jylla, kiba thmu ban wan bamduh bad leh donbor hapoh ka jylla.
Ka seng kan nym ailad ia ki briew nabar ba kin wanleh donbor hapoh ka jylla, kata da kaba khniot pat ia ki trai ri trai muluk bad ka seng kan nym ailad satia khamtam kito ki bym don ia ki kot ki sla kiba biang, namar lada ka seng kan lap, kan sa leh beit da kaba tyngeh.
Phi don ban ong eiei?