“SIEW DA KABA BHA”

Dr. Bankit R. Marpna

Wow!!Kane ka bynta ka long kaba eh haduh katta katta mo ban iakren, lada khlem ka bor ka jong U Blei, ngin nym lah ban leh ia kane ka bynta. U Paul ruh u ong ba nga lah ban leh ia kiei kiei baroh ha uta uba pynshait bor ia nga (Philipi 4:13). Haba don ba leh sniew ne leh bym dei ia ngi, ka ju don ka jingbitar ban siew kylliang da kaba sniew ne ban ap kmang lano ban leh markylliang namar ba la buhnud ha ka dohnud.

Ha ka jinglong kaba kynja mynsiem, ka Bible kam shah ia ngi ban leh kumta. Peit ia ka jingim ka jong u Joseph ba kumno ba um siew kylliang ia la ki jong ki hynmen hadien ba ki la leh ia kaba sniew ia u. Peit ka jingim jong U Jisu khamtam, U ieid ia ki nonglehsniew bad U ong to map ia ki namar ba kim tip ia kaei kaba ki la leh. Ka jingkhot ka jong U Blei ia ngi kum ki nongbud jong U Jisu, ka long ba ngi dei ban leh bha ne siew da kaba bha ia kiba leh sniew ia ngi, duwai ruh na ka bynta jong ki bad ban ym siew kylliang da kaba sniew hynrei ban siew kylliang da kaba bha ia kaba sniew. ki don shibun bah na ki dkhot Bible kiba kren halor kane ka bynta hynrei tang katto katne ba ngin puson bad leh ia ka ha ka jingim jong ngi, kiba la tip ia ka Ktien jong U Blei.

Lok baieid! U Blei khot bad U pynkynmaw ia ngi ba ngi dei ban siew da kaba bha ia kino kino kiba long ki nongshun ha ka jingim jong ngi. Duwai bad pan ka bor na U Blei ba U Blei Un ai ka jingjop ia ngi ha kane ka bynta. Ban iakren (Theory) ka long kaba suk hynrei ban leh pat (Practical), kam dei ka kam kaba jem. Lada ngi nang ban siew kylliang da kaba bha, ka don ka nong ba U Trai Un ai. Paralok, ka Ktien jong U Blei ka kren kumne harum bad tang katto katne khnang ban pashat lem ha ine i jingthoh iba rit:

“Wat ju ong, Ngan leh ha u kumba u la leh ha nga; ngan ai ha uta u briew katba kum ka kam jong u” (Proverb 24:29)

“Lada u nongshun jong me u thngan, ai jingbam ia u ba un bam; bad lada u sliang, ai um ia u ba un dih: naba myn kynton ia ki rnga ding harhem halor ka khlieh jong u, bad U Trai un ainong ia me” (Proverb 25:21, 22)

“Wat ai ba yn jop noh ia me da ka jong kaba sniew, hynrei to jop noh ma me ia kaba sniew da kaba bha” (Nong Rom 12:21)

U Blei Un Kyrkhu, Amen.