U khaw bad ka pisa, iarap ka FKJGP, sha ki nongthoh khubor

Nongpoh: Myn hynnin ka sngi ka sngi ki Nongialam ka FKJGP, ki la pynlong ia kawei ka prokram ban iarap kyrpang ha ophis treikam ka Seng kaba don ha Byrnihat bad kata ka long ban iarap da u Khaw ha ryngkat ka song pisa sha ki Nongthoh khubor kiba don ha Ri Bhoi.

Ki nongialam ka FKJGP ha Ri Bhoi, kiba kynthup ia u Bah Luistar Lyngdoh, President bad u Bah Lumlang Mawnai, Senior Vice-President, ha ryngkat ka jingdon kiwei ki dkhot ka seng, ki la ong ba ka nongrim kaba la pynlong ia ki kum ki nongialam ka seng ban noh synniang sha ki Nongthoh khubor, ka dei namar ba ki sngew ba kum ki nonglum khubor, ki dei kiba trei shitom hapdeng kane ka khlam COVID-19, kata ba ki la trei shitom ban pynphriang ia ki khubor sha ki paidbah hapoh ka District bad jylla hi baroh kawei.

Haba iadei bad katei ka kam kaba la leh kyrpang da ki FKJGP, na ka liang ka kynhun ki nongthohkhubor ha Ri Bhoi, ki la pynpaw ia ka jingsngewnguh kaba khraw eh halor ka jingkynmaw kyrpang bad kiba la lah ban pyni da ka kam, lyngba ka jingiarap da u khaw bad ka pisa ruh kumjuh.