“KA LYNTI BAN JIED”

Dr. Bankit R Marpna

Ka lynti ban jied ka shong ha u ne ka briew shimet. Ym lah ban pynbor mano mano haba ki briew ki jied hi ia la ka lynti ne ka jingkwah jong ki hi. Kumba ngi tip ba U Blei Um ju pynbor bad U ai ha ka mon laitluid ia ngi ki briew ban jied. Haba ngi peit naduh ka Testament kaba rim ba kumno U Blei U ai ka mon laidluid ha ka kper Eden ia u Adam bad ka Im ban jied la ka long ia kaba bha ne kaba sniew. Ngi kynmaw ia u Joshua haba u kren sha ki paitbah ha kito ki por, u ong iano phin jied ban shakri? U Joshua u jied da kaba ong ‘Ma nga bad ka iing jong nga, ngin shakri ia U Trai.

Kane ka bynta ban jied ka long kaba donkam bha haduh katta katta. U khynnah skul u don ka thong bad u jied ia kano ka lain ba u kwah ban pule, la ka long u kwah ban leit pule ne long IAS, Doctor, Engineer bad kumta ter ter. Ki nongpyni ki lah ban iarap hynrei ka mon ban jied pat, ka shong ha u ne ka khynnah pule ia kaei kaba ki kwah”.

Kumba la batai haneng, ba ka jingjied ha kaba iadei bad ka jinglong khristan jong ngi, ngi lah ban ong ba ka shong ha ka kti jong ngi, la ngin shakri ia U Trai ne ngin im ka jingim bad kane ka pyrthei kaba tyrwa jingsngewbha kaba tang shipor. Kaba nga pat kwah pat ban ktik ia ka jingmut jingpyrkhat jong ngi ha ine i jingthoh ka long ba ngi donkam ban iaid ha ka jingsheptieng ia U Trai bad wad ia ka mon jong U khnang ba ngin jied ia kano ka lynti ha ka jingim jong ngi ha la ka jong ka jong ka bynta kaba U Blei U thmu. Ka Bible ka ong ba ka jingsheptieng ia U Trai ka long ka jingsdang jong ka jingstad. Ai ba kane kan rung shuwa ha ngi ban sheptieng ia U Blei shuwa ba ngin jied ia kata ka jingjied kaba ngi kwah.

Hooid, ka Bible ka ong ba U Blei Un ai ia ki jingkwah jong ka dohnud jong ngi (Salm 37:4), kata pat ka long ba ngin hap ban pynsngewbha shuwa ia U. Ka nongrim kaba nga kwah ban wanrah ka long ba ngi dei ban sheptieng ia U Blei bad ban wad ia ka khmat jong U ia kaei kaba ngi kwah ban jied ha ka lynti iaid jong ngi. U Blei Un hikai ia ka lynti kaba ngin jied khnang ban ngin nym bakla lynti ha ka jingim jong ngi.

Lok baiied, phi lah ban long ki khynnah skul bad phi kwah ban tip ia ka lain aiu nangne shakhmat? Phi lah ban long ki khynnah kolej, phi lah ban long ki khynnah ha ki universities bad ki institutions kiba pher ba pher bad ka kam aiu ba nga dei ban trei bad wat ia kiba la don la ka iing ka sem ruh ka don ka lynti kaba ngi kwah ne ngi hap ban jied ha la ka jong ka jong ka jingshem. Ka Bible ka don ka jubab:

“Uei uta u briew uba sheptieng ia U Trai? Ia uta un hikai kein ha ka lynti kaba un jied” (Salm 25:12)

U Blei Un Kyrkhu, Amen.