La ioh ban sei sa ia ka met kaba lai jong u nongbylla tih dewiong

Shillong: Ka jingnang ioh sei ia ki metiap jong ki sanngut ki nongbylla tih dewiong kiba la sah kut ha ka krem Ule kaba don ha ka shnong Umpleng kaba hap hapoh ka East Jaiñtia Hills District kiba la sahkut naduh ka 30 tarik u bnai Jymmang 2021, ka la nang iaid shakhmat ha kaba ha ka 25 tarik u bnai Jylliew 2021 ki shipai jong ka Indian Navy ki la lah ban sei sa ia kawei ka met kaba lai jong uwei napdeng kitei ki nongbylla ha ryngkat ka jingiarap lem jong ka kynhun National Disaster Response Force(NDRF) bad State Disaster Response Force(SDRF) bad ia ka met jong utei u nongbylla la pynkit noh sha ka jaka ba buh metiap kaba don ha Civil Hospital Khliehriat.

Kum ban shu pynkynmaw kitei ki lai tylli ki kynhun ki la dep ban sei ia artylli ki met jong kitei ki nongbylla kata ha ka 16 tarik u bnai Jylliew 2021 bad ha ka 24 tarik u bnai Jylliew 2021 bad ia mynta kitei ki kynhun kin dang iai wad sa ia artylli ki met jong kitei ki nongbylla kiba dang sahkut shapoh jong katei ka krem. Na ka liang jong ki bor synshar ka East Jaiñtia Hills District ki la phah khubor sha ki bahaiing hasem jong kitei ki nongbylla.