Ha Maharashtra, kyrshan khang pyniap masi ka Congress

Mumbai, 6 Iaiong:
Ka ain ban khang pyniap masi ha Mahara shtra, kaba la ioh ia ka jing mynjur jong U President ka Ri India, ka la pynmih ia ka jingiapher jingmut hapdeng ki ar tylli ki liang pyrshah ha Maharashtra, ka Congress bad ka NCP. Ka NCP, ka ong ba ka jingkhang ban pyniap ia ki masi, kan buh ia ka jingeh kaba khraw shibun eh, ia ki nongri jingri.
Hynrei, na ka liang ka Congress, ka pdiang sngewbha ia katei ka ain, kaba la mynjur da U President, Pranab Mukherjee. “Ka Congress, ka pdiang sngewbha ia ka jingmynjur jong U President bad ka dei ka ain, kaba la shu iai sah teng ha ka miej jong U President. Tangba ym dei ban shim kabu politiks, na bynta kane ka phang bad ka jingteh lakam, ka dei ban long kaba hok bad kaba shai” ong u nongialam liang pyrshah ha ka iing dorbar jong ka Maharashtra, U Radhakrishna Vikhe-Patil. Na ka liang jong u nongkren jong ka NCP, u Nawab Malik, u ong ba ka seng BJP, ka ialam bakla ia ki briew halor katei ka ain bad ka wan rah ruh ia ka jingduhnong kaba jur ia ka imlang sahlang.
Mynta, ka la don ka jingkhang ban pyniap masi ha katei ka Jylla, ha kaba mynta kan dei ka ain, kaba ym lah shuh ban ioh jamin bad kaba dei ban shah set phatok, na ka bynta san snem kynthih bad ka kuna ruh, kaba dei ban siew, kan long T.10hajar.