Tar ki pulit ia ar tylli ki jingthoh kynroh, ka KSU ha Khyndailad

Shillong, 5 Iaiong:
Ar tylli ki jingthoh ba la thoh da ka Seng Khasi Student Union, kiba la wah ha Khyndailad ha ka sngi kyrsiew ri kaba la long ha ka sngi saitjain ki la shah weng bad shah tar ha ki pulit naba ha kitei ki jingthoh la thoh, “We are Khasi by Blood, Indian by Accident” haba la pynkylla ha ka ktien Khasi kaba mut ba “Ngi dei na ka snam Khasi, ngi long nong India khlem poi pyrkhat”.
Haba ia kren bad U Rupang u General Secretary ka KSU u samla Auguster Jyrwa, u la ong ba la ai daw ba la weng noh ia katei ka jingthoh ka KSU ar tylli kiba la pynieng ha Khyndailad naba la ong ba ka dei ka jingthoh kaba pyniapher jaitbynriew. U samla Jyrwa u la ong ba ha ka jingshisha ia katei ka juh ka jingthoh ka KSU ka ju wah ha manla u snem ha manla ki jaka ha ka sngi kyrsiew ri, hynrei dei tang mynta u snem ba ka sorkar ka sngew tohmet bad la weng noh ia ka. “Ngim da tip balei la weng noh ia katei ka jingthoh kaba don ha Khyndailad, hynrei la ioh jingtip ba ki ong ba ka dei ka jingthoh kaba pyniapher jaitbynriew” ong u samla August haba ia kren bad u Rupang, mynta ka miet.
Lah ban kdew ba ha katei ka sngi kyrsiew ri, ka KSU ka la pynieng ia ki jingthoh kiba pher bapher kiba la wah ha kylleng ki jaka jong ka nongbah Shillong kum ha Mawlai Petrol Pump, Laban , Khyndailad bad sha kiwei pat ki jaka. Nalor katei ka jingthoh ka la don ruh ka jingthoh kaba la thoh, “Sa shisien kin win ki khlaw, sa shisien kin khih ki maw”. Ha motphran ka KSU ka la wah ia ka jingthoh kaba ong, “If to love our land is a crime, then we are all Criminals?” kaba mut ha ka ktien khasi ba “Lada ngi ieit ia la ka jong ka ri ka dei ka kam sniew, kumta baroh ngi dei ki riew sniew?”. Ha Motphran ka jaka ba la pynlong ia ka jingialang paidbah ka KSU ka la wah ia ar tylli ki lama saw ha ka jaka ban rung ha ka jaka shong ki nongialam, ha kaba u President Rangbah katei ka seng u samla Daniel Khyriem u la ong ba kitei ki lama saw ki dei ki dak ka jingsdang ka thma, ha kaba ka KSU nangne shakhmat kan nang iai kyrhuh bad kyrhuh , ban ia khun na bynta ki mat kiba ktah ia ka jaitbynriew.