Dawa dorbar ka ARPA na u Lat

Shillong, 05 Iaiong:
Ka All Regional Parties Allliance (ARPA) ka la kyntu ia u Lat ka jylla ba un hukum ban khot ia ka dorbar kyrpang jong ka KHADC na ka bynta ban jied ia u Chief Executive Member (CE M) ba thymmai ka Council. Ka ARPA kaba don 16 ngut ki MDC ka la kynduh kham mynshwa ia u Lat ka jylla u Keshari Nath Trpathy  ban pyni ia ka jingbun paid jongki bad ban pyrshah jur iaka rai jong ka sorkar jylla ban pynjari synshar administrator ha KHADC.
 ”Hadien ba la hiar shuki u CEM u Bah Adelbert Nongrum, kam don jingeh shuh ban khot ia ka dorbar kyrpang na ka bynta ban jied ia u nongialam ba thymmai ka Council. Ngi kyrpad ia u Lat ban khot dorbar kyrpang ban pynlong kam ia ka synshar khadar ha KHADC katkum ka riti synshar ka ri”, la ong u chairman ka ARPA u Bah Metbah Lyngdoh ha ka shithi ba la phah sha u Lat ha kane ka sngi Palei.
U Bah Lyngdoh u la ong ba ka dorbar ka dei ka jaka kaba biang eh ban iapyni ia ka jingiabun paid.
U la kyntait ia ka jingkam ka sorkar ba ka sain pyrthei ka synjor ha KHADC. “Kam shym don kano kano kano ka jingsynjor ha ka sain pyrthei ha KHADC kumba la kam da ka sorkar”, la ong u Bah Lyngdoh.
“Ngi don ha ka jingbun paid jong ki MDC ha ka Council,” la ong u chairman ka ARPA.
U la kyrmen ba u Lat un pyndonkam hok ia ka bor jongu ban leh ia kaba dei.
U la iathuh ruh ba la dep phah shithi sha u Lat ban iakynduh biang ban batai ia ka jinglong jingman ka sain pyrthei.
U la ong ba ka ARPA ka don ka hok katkum ka riti synshar ban bteng ia ka jingsynshar namar ba ka don hapdeng ka jingbun paid.