Bym lah eksamin, weng kam ia 3000ngut ki nonghikai LP, ong ka High Court

Patna, 3 Iaiong:
Kumba 3000 ngut ki nonghikai skul Primary ha Bihar kim shym la pass ha ka eksamin kaba la pynlong arsien ha katei ka jylla na ka bynta ki nonghikai, kaba la tip kum ka Teachers Eligibility Test (TET) , bad halor katei ka jingbym lah jong ki ka High Court jong ka jylla Bihar ka la pynmih hukum ia u Principal Secretary ka tnad pule puthi katei ka jylla ba ka tnad ka dei ban weng kam noh hapoh shi taiew. Ia katei ka hukum ka high Court ka la pynmih ha ka sngi palei jong ka taiew, katei ka hukum hka la mih ha ka por ba kawei ka nonghikai ka Rizwana Khatoon ka la kyrpad ban ym weng kam ia ka namar katei ka jingbym lah ban pass ia katei ka eksamin.
Ka khubor na ka tnad pule puthi katei ka jylla Bihar ka la iathuh ba kam lah ban iaid lait ia ka hukum jong ka kashari bad kumta ka hap ban weng kam noh ia kitei ki 3000 ngut ki nonghikai ki bym shym la lah ha ki ar tylli ki eksamin. “Ka sorkar kam don lad da kumwei pat, hynrei ka hap ban bud ia katei ka hukum” ong ka khubor na u wei na ki ophisar ka tnad pule puthi katei ka jylla.
Lah ban kdew ba ha u snem 2012, 151 ngut ki nonghikai ki la shah weng kam namarba kim shym la pass ha kitei ki ar tylli ki TET, la phah thoh eksamin ia ki nonghikai ha ka subjek English, Mathematics, Hindi bad
General Knowledge kaba tang haduh ka kyrdan pule klas V . “Katei ka test ka dei ban peit ia ka jinglah ki nonghikai ban hikai ia ki khynnah, ki hap ban pynshisha ialade ba ki lah ban hikai ne ki hap ban iehnoh ia ka kam hikai” ong biang ki lad khubor na ka tnad pule puthi ka jylla Bihar.
La pynlong ia katei ka Test ar tylli ka dei namar ka jingailad ia ki nonghikai ba lada kim lah ia kaba nyngkong , ki hap ban ia khun biang ha kaba –ar bad lada kim lah ha kane ka sien ba-ar kin duh noh ia ka kam jong ki, iathuh ki lad khubor.  Ha ka jylla Bihar la pynlong ia kiba kum kitei ki Test naduh u snem 2008, bad u snem 2013 dei u snem ba bun eh ba ki nonghikai ha bihar ki la shah beh kam, ha kaba ki la don kumba 10 hajar ngut tam ki nonghikai kontrak ki bym lah ia ka Test.