“U SHABI”

DR. B.R. MARPNA

U shabi u dei u wei u jait tiar uba ki briew ki ju pyndonkam bha la ka long ha ki iing ki sem, ha ki office, ha bank, ha ki dukan bad ha kiwei kiwei de. U dei u tiar uba don ryngkat bad u tala ne uba don ha ki jingkhang (godrej) kiba ngi ju khang ia ki almari ne ki kino kino ki tiar kiba ngi kwah ban khang (lock). Haba kum pynjah ia u, kan long kaba eh bha ban plie, lait noh sa tang haba ngi kwah plie jubor ne pynjot noh ia ki jingkhang ne ki almari bad ngi lah ban ong ba u long uba donkam bha ha ka jingim jong ngi ki briew namar u dei u tiar uba ai jingshngain. Ki don ki tala kiba don 2 shabi, 3 shabi ne wat 4 shabi ruh bad ka shong ha ngi kumno ne da uei ngi kwah ban thied ban pyndonkam. Ki briew haba ki thied ki kham sngewtynnad ban thied da uba don bun shabi namar uba lah ban pyndonkam da 3 ne 4 ngut ki briew.

Ha ka jingim kaba kynja mynsiem jong ngi ruh, ngi don U Shabi U ban plie ia ka jingim jong ngi bad Uta U dei U Blei, Uba long U Jisu Khrist Uba U Trai jong ngi. Balei nga ong kumta? Ki don shibun bah na ka Bible kiba lah ban pynshisha ba kumno U Blei U plie ia ki lad kiba pher bapher ia ki briew jong U Blei ban pyndonkam na ka bynta ka burom jong U. Haba ngi phai na ka Testament kaba rim, ngi lah ban peit na ka jingim jong ka Ester ba lyngba jong ka, kumno ba ka pyllait im ia ki briew ha kito ki por. U Joseph ruh u dei uwei na ki. Ngi kynmaw ba kumno ba lyngba ka jingdon jong u Joseph ha ka jinglong mraw bad haduh ba un da long u Nongsynshar uba la bsa ia ka jingkyrduh kaba don ha kito ki por bad khamtam bad ki hynmen jong u Joseph kiba wan ban wad kpu (jingbam) namar ka jongkyrduh.

Lok baieid, U don U shabi jong U Trai ia ka jingim jong ngi ban khyrwait khnang ban ioh plie, ban plie lada don mano mano ba khang. Hato phi shah ba U Blei Un khyrwait ban pyniaid ia ka jingim jong phi, ne phi shaniah halade? Parabangeit, don ka por ba phi ong, mano ban plie lad ia nga? Lano U Blei Un plie ka lad? Ka jubab ka long, AP IA KA POR (TIMING) JONG U. Shuh shuh, haba U Blei U plie, yn ym don mano mano ba lah ban khang ia kaei kaei kaba U Blei U thmu ban pyndep ha ka jingim jong ngi bad haba U Blei u khang pat, yn nym don mano mano ba lah ban plie. Iaroh ia U Trai. Te kumta, U shabi ha ka jingim jong ngi, ka dei na U Trai. Uei uba lah ban khang ia ka jingthmu jong U Blei. U soitan u khanglad, hynrei U Blei Un plie. Ka don ka jingrwai kaba ong “God will make a way where there seems to be no way”. Ka Bible ka ong kumne ”Bad ha uta u angel jong ka balang kaba ha Philadephia to thoh: Ia kine kiei kiei ruh u ong uta Uba khuid, uta Uba shisha, uta uba don u shabi jong U David, uta uba plie te uno uno ruh um khang, bad u khang te uno uno ruh um plie.” (Ka Jingpynpaw 3:7)

U BLEI UN KYRKHU, AMEN.