Duna ka jing ai dawai, ia ki khyllung sha Dong Mihngi

Shillong, 01 Iaiong:
Lai tylli ki district ka Meghalaya kynthup ka East Khasi Hills, West Khasi Hills bad ka West Garo Hills ki la ioh ia ka jingphai khmat ba kham kyrpang jong ka ‘Mission Indradhanush’ ka sorkar pdeng kaba ka jingthmu ka long ban pynioh injek ia baroh ki jaka bym pat ioh na ka bynta ki khynnah shwa ka snem 2020. Kane ka dei ka injek kaban iada ia ki jingpang.
Haba pyntip ia kane ha ka workshop jong ka ‘Mission Indradhanush’  ha Guwahati  ha kane ka sngi Balang, u Director ka Regional Resource Centre for North East, u Dr AC Baishya u la ong ba baroh 201 tylli ki district ha ka ri ki la shah jied ban wan hakhmat eh na ka bynta kane ka jingthmu.
Haba kdew ia ka jingbun ki khyllung ba iap ha kane ka dong mihngi, u Dr Baishya u la ong pynpaw ia ka jingsngew khia ia ka jingduna ka jingai dawai ha kane ka thain ia ki khyllung.
Katkum ka jingong u Dr AC Baishya, ka jingthmu jong kane ka Mission ka long ban pynioh lut ia baroh ki jaka bym pat ioh injek ia ki khynnah hapoh karta 2 snem bad ki longkmie ba ar met.
Ki jingpang kiba hap ha kane ka Mission ki kynthup ia ka diphtheria, jyrhoh ksew, tetanus, polio, tuberculosis, nianglyngkut, bad hepatitis B bad ia ka jingai injek yn leh ha u bnai Kyllalyngkot bad u Jylliew lashem snem.
Haba batai ia kane ka Mission, u Dr A Deka na ka World Health Organisation(WHO) u la ong ba ka donkam ia ka jingleh sted ban pyndep ia kane ka kam ha kane ka thain dong mihngi.
Ha kane ka Mission ka sorkar ka thmu ban pynioh injekshon ia baroh la kumno hapdeng 65 percent haduh 90 percent.
Ki Anganwadi bad ki Asha  kin pynlong ia ka jingsurbe ha ki jaka ba la buh bad ban pynthikna ia kito kiba dei ban ioh ia kane ka injek bad ia kane yn peit bad bishar bha da ka World Health  Organsiation bad ka United Nations Children’s Fund (UNICEF)  nalor ki Chief Secretary jong ki jylla bapher bapher ka thain.
Ha u snem 2009-2013, ka jingioh ban pyndih dawai ka la long 61%  haduh 65%, kaba mut ba 1%  ka la nang kiew man u snem. Ban jop ia kane ia baroh, ka Mission ka la buh thong ban pyndep ha u snem 2020.