Syrtok ki paidbah ha ki 5 tylli ki shnong, bym lah pynbiang ki company ïa ka Network bad ki tiar kiba la sniew

Shillong: Ka Khasi Students’ Union (KSU) Nongtyngur Unit ha kaba nyngkong eh ka pynpaw ia ka jingsngewkhia kaba khraw eh halor ka jingbym kheiñ snep ki Company ban pynbiang ïa ka Network sha ki 5 tylli ki Shnong kiba kynthup ïa ka shnong Nongtyngur, Nongkyndah, Lumwahñiai, Ri-Massar bad Nongeitñiang. Bad halor kane, ka seng ka la dep ban buh ia ka jingujor sha ki company pynbiang network ha kine ki bnai ba ladep, hynrei haduh mynta ruh naka liang jong ki company kim pat pyni dak ei ei ruh.

Ha ka jingiakren bad uwei na ki nongtrei jong kawei ka company pynbiang network, kata ka dei ka Company Reliance Jio bad la iathuh ba ka jingbym biang network ka dei namar ka jingthut bad ka jingsniew ki bynta jong u tower.

Ha ka juh ka por, ka seng ka la leit jurip bunsien sha ki jaka ba don u network tower bad ban beh kylli na ki nongap pahara bad wat la ka company ka don la ki nongap pahara ia ki network tower, hynrei kaba shem jingeh ka long ba kine ki nongap kim shym la shong la sah hangne bad ia ka Gate ruh ki shu ieh ryngheng bad khlem da khang tala bad ngim shym la iohlad ban iakynduh markhmat. Hynrei ha ka jingiaipyrshang ban wad jingtip, u nongap pahara u la ai daw ba ki jingeh kiba mih na tei u tower ha Nongkyndah ka long na ka jingbym don Electricity bad don ruh ki tiar ki tar kiba la sniew da ki snem.

Halor kane ka jingeh, ki paidbah khamtam ki Samla pule jong kane ka thaiñ ki la sngew syrtok bad khuslai sah khamtam ha kum kane ka por kaba ki pynlong class lyngba ka juk jingstad ka internet. Shuh shuh na ka liang ki nongialam ka seng KSU ki lah ïoh ban pyntip la bunsien lyngba ka phone calls sha ki nongtrei ka Company bad ka seng ka lah dep phah ruh ïa ka Complain letter lyngba ka email, hynrei kaba sngewsih pat kalong ba na ka liang ki nongtrei kitei ki Company ki shu ai daw barabor da kumne kumtai bad haduh kat kine ki sngi ruh u tei u Network tower um shym lah satia ban ai ka jingshakri kaba myntoi ïa ki paidbah hynrei ka Company ka lah shu bamklop ei da ki snem ki snem ïa ki Customers jong kitei ki 5 Shnong.