Ka lad siew shisien siew, ka dei ba ki petrol pump, kin siew ia ki khajna jongki, ong u myntri

Shillong: U myntri ba dei peit ia ka tnad khajna ka sorkar jylla, U James P.K Sangma u la pynshai ba ka jing pyntreikam ia ka skhim ban siew shisien siew lane One Time Settlement (OTS), na ka bynta ki Petrol Pump ka dei na ka bynta ban pynthikna baki trai Petro Pump kiba don hapoh ka jylla Meghalaya kin wan sha khmat ban siew iaka khajna kaba ki la shah sha ka sorkar jylla.

Haba kren bad ki lad pathai khubor u Sangma u la ong ba ka liangpyrshah ka dei ban sngewthuh ba kane ka jing pyntreikam ia ka OTS kam dei ka kam beain, namar wat ka sorkar India ruh ka ju pyntreikam ia kane ka skhim na ka bynta ban ioh lum iaki jait khajna baki kompeni ki shah shaka sorkar.
“Ka long kaei kaei kaba lyngoh ba ka Congress ka thew beit ba kane ka skhim OTS kadei ka kam beain, ka Congress ka dei ban sngewthuh ba kane ka skhim OTS naka bynta ki Petro Pump kan iarap ia ka sorkar jylla ban iohlum iaki khajna naki Petrol Pump khamtam kum ha kane ka por baka jylla bad ka ri India hi baroh kawei ka don ka jing hiran pisa” la ong u James Sangma.

U James Sangma u la ong ba kane ka jing pyntreikam iaka OTS skhim kan pynthikna baki trai Petrol Pump kin wan shakhmat ban siew iaka ram (Khajna) ba ki shah bad ka sorkar, namar ka sorkar kan map katto katne percentage ia ki ram jong ki daka ba siew thikna iaka khajna baki shah bad ka sorkar.
Haba kylli kaei ka sienjam baka sorkar kan shim naka bynta kito ki petrol Pump ki bym siew iaka khajna lyngba ka OTS, u James Sangma u la ong baka sorkar kan nym ai ki ‘C Form’ sha kino kino ki Petrol Pump bad kane kan khang iaki Petrol Pump ban wanrah Petrol na bar jylla jylla naka bynta ban die shapoh ka jylla.
“Lyngba kane ka OTS, ki trai Petrol Pump kin hap ban siew ia ka khajna ba ki shah bad ka sorkar bad lada kim pyntreikam ia kane ka skhim, ka sorkar jylla kan khanglad ia ki ban khaii petrol hapoh ka jylla” la ban biang u James Sangma.

U James Sangma u la iathuh ba kane ka jing pyntreikam ia ka OTS ka la iaid shaid shaid bad kila don katto katne ki trai Petrol Pump kiba la wan shakhmat na ka bynta ban siew ia ka khajna ba ki shah bad ka sorkar bad kane ka kdew ba ka jing pyntreikam iaka skhim OTS hapoh ka jylla ka long kaba seisoh.