Nongpoh: Ka Ri Bhoi Youth Federation, ka la byrngem ban khang tala syndon ia ki ophis treikam jong ki artylli ki kompani kiba peit ia ka Network mobile, kiba kynthup ia ka Jio bad Airtel, kata hadien ba la lap ba kitei ki Network kim lah shuh ban ai ka jingshakri kaba janai ia ki paidbah kiba ka thain Patharkhmah hi baroh kawei.
Haba pyntip sha ki lad pathaikhubor, u samla Rishan Nongtri, Education Secretary RBYF, Sengkmie, u la ong ba ka seng ka aipor 24 kynta ia kitei ki Kompani ba kin pynbiang noh mardor ia ki network ha katei ka thain, namar ba ki paidbah bad khamtam eh ia ki khynnah skul, ki la shem jingeh palat, namar la jan baroh ki skul la hap ban shu leh online, katba lada ym biang sa ka Network, ka la nangpynjynjar eh ia ki.
Utei u nongialam ka RBYF, u la ong ruh ba lada kitei ki kompani kum lah ban pynbiang ha katei ka por kaba la buh da ka seng, ka seng kam banse ban shim da ki lad kiba kham tyngeh, la ka long ban khang tala ia ki ophis treikam jong ne wat ban leit pynthut ia ki Tower kiba la pynieng ha kiba bun jaka ha katei ka thain, namar ki sngew ba kam don jingmut ban shu don tang ki Tower, katba ka Network pat kam long.
Phi don ban ong eiei?