Khlad U Ziona, uba bun tnga tam ha ka pyrthei

AIZAWL: U Ziona Chana, uba dei uba don bun tam ki tnga ha ka pyrthei, ula khlad noh mynta ka sngi, ha ka jingshah sumar ha hospital ha Aizawl, ha kaba la iathuh, ba u dei uba pang khyllai.

U Chana, u don 39ngut ki tnga, 94ngut ki khun, 14ngut ki pyrsa kurim, 33ngut ki ksiew bad sa uwei u ksiew tun jongu bad haba khein lang, ki don baroh 181 ngut, ha katei ka long iing.

U Ziona, u dei na ka shnong Baktawng, kaba ha Serchhip district bad kaba don 100 kilometre shathie jong ka Aizawl. La kha ia u, ha ka 21tarik Naitung 1945 bad ula ioh briew, naduh ba u dang don 17 snem ka rta bad ka Zathiangi, ka dei ka tnga ba nyngkong jongu bad ka dei ruh ka khlieh jong ka iing ba ki ia shong ia sah baroh kawei. Hadien kata u sa nang bteng ban ioh sa shibun kiwei pat ki tnga jongu bad la iathuh ba shiphew ki tnga jongu, ki dei kiba u ioh tang ha ka shisnem.

Ka jingbun ka iing U Ziona, ka long ki ia bam shi kwintal u khaw bad nangta sa 70 kilo u phan ha ka shisngi.