Kyrshan KSU, ka FKJGP khreh jingiakhih ba eh

Shillong, 29 Lber:
Ka FKJGP Seng kmie ha ka kyrwoh khubor ba la pyllait paidbah mynta ka sngi ka la pynpaw ba ka ai ka jingkyrshan ba pura halor ka jingiakhih ka KSU ban khang noh ia ka jaka pynrung kyrteng thep vote kaba don ha ophis u Deputy Commissioner, East Khasi Hills. Ka Kyrwoh na u Chief Organiser katei ka seng u samla Marbud Dkhar ka la ong ba ka FKJGP ka ai ka kti ka mon ka diang ban kyrshan ia ka KSU ha katei ka jingiakhih, watla ka donkam ban ia mih madan da ki jingiakhih kiba tyngeh katei ka seng ka long kaba la khreh.Ka FKJGP ka la pynpaw ia ka jingbitar ia ka jingplie biang ka sorkar ia katei ka jaka pynrung kyrteng thep vote watla ka la kular ha u snem 2012 ban khang noh syndon ia ka hadien ka jingiakhih kaba bun ki seng bhalang ki ieng pyrshah. Ka la ong ba ka jingbuh ia katei ka jaka pynrung kyrteng thep vote ka la ailad ia ki briew ba nabar ban rung kyrteng da kaba suk khlem da donkam ia kino kino ki kot ki sla ban pynshisha ialade, bad ka la ong ba ka ioh jingtip ba kumba 80 haduh 99 na ka shispah kiba pynrung kyrteng ha katei ka jaka ba buh ka sorkar ha ophis DC ki dei ki bar jylla kiba shu wan poiwir. Katei ka seng ka kwah ba ka jingpynrung kyrteng thep vote ka dei beit ban leit sha manla ki shnong khnang ba ia ki briew kiba ioh ban rung kyrteng dei ban pynshisha da ki rangbah shnong.