Yn thoh ka MeECL sha ka MSERC, ban pynkiew biang ia ka bai light

Shillong: Hadien ba ka tnad bording ka la lah ban pynkohnguh ia ka tnad pla pisa, ba kan bah khlieh na ka bynta ka MeECL khnang ban shim ia ka ram AtmaNirbhar na ka REC bad PFC, kum shi bynta ban wad ia ki lad ki lynti ban siew ia ka ram ka ba la shim da ka MeECL, kumta u myntri ka tnad bor ding ha ka jylla u James PK Sangma u la pynlong ia ka jingialang bad u CMD, ki Director bad ki Engineer jong ka MeECL myn hynnin ka sngi.

Na ka liang u Myntri ka tnad bording u la iathuh ba ha kane ka jingialang la shim ia ki katto katne ki rai bad ki sienjam, ba kin shim, khnang ba kin lah ban pynmih ia ka ioh ka kot na kane ka tnad bad ia kane la ai por hynriew bnai ia ka MeECL ba kin trei shitom.

U Sangma u la iathuh ba kane ka jingialang la khot hadien ba ka sorkar ka la shim ia ka rai ba kan ai ia ka jingbah khlieh kaba 100% ia ka ram Atmanirbhar kaba la shim na ka REC bad ka PFC.
Ha kane ka jingialang, la shim ia ki rai na ka bynta ban pynkhlaiñ bad pynbha ia ka jingtreikam jong ka MeECL kiba don haduh 4800 ngut ki nongtrei.
U myntri ka tnad bor ding u la pynsngew ba la dei ban ai biang ia ka jingthoh sha ka MSERC, ban kyrpad ban pynkiew ia ka bai light kaba ym shym la pynkiew mynta la bun snem.
U James u la iathuh ba ha kane ka jingialang la shim ia ka rai ba ia ka jaka pynmih bor ding ha Leshka bad ha Umtrew kaba ym shem la pynmih bor ding shuh na ka daw ba ki don jingthud, na ka liang U myntri u la bthah ban jurip biang ban pynbha ia kane jingpynmih bor ding, katba ia ka jaka pynmih bor ding kaba dang shna mynta ha Riangdo West Khasi Hills, ka Ganol HP ha West Garo Hills bad kiwei ki jingtrei kiba dang iaid ka MeECL ka dei ban pynbha ia ka rukom pynpoi bording bad ki dei ruh ban ai ia ka kaiphot sha ka sorkar u la ong.

Ban pynbha iaka rukom shim bai light la bthah iaka MeECL ban peit ruh artad ba ka jingjah ka bor ding kam dei ban dang kiew, hynrei ka dei ban shim iaki lad ki lynti ban pynduna iaka. La ai bor ruh ba ka MeECL ba kan ot beit na phang iaka bor ding lada ki nong shim bording kim siew, u la bynrap.
Kawei ka rai kaba ka jingialang ka la shim ka long ba kito ki shnong kiba don kumba 300 tylli kiba khlem ioh bording, namar ba ki pynsah ka bai bording mynta yn leit ban pynbuh biang ia ki transformer ban pynioh bording biang sha kito ki shnong, hynrei kito ki iing ba khlem siew ia ka bai light ka tnad ka lah ban ot beit ia ka bording.
Haba jubab iaki jingkylli u myntri u la ong ban pyntrei kam iakane yn thaw iaka “village electricity committee” ban peit ba kan ym don ka jing iatuh light.

Ha kane ka jingialang la shem ba ki don shibun ki kam ba lait hapoh ka MeECL, hynrei kala don ka rai kaba khlem da ioh jingbit na ka tnad kam bor ding ym lah ban thung kam ha kito ki kam ba lait.
Na ka liang u myntri ha kane ka jingialang u la lap ruh ba ki don ki shnat treikam hapoh ka MeECL ki don ki bynta kiba la bun briew palat, kiba shu shong kai khlem kam bad ki don pat kiba duna ki nongtrei bad ban ym ktah ia ka jinglut jong ka MeECL, u myntri u la bthah ban pynkynriah noh ia ki nongtrei na ki jaka ba bun briew sha kiba duna ki nongtrei, katba ia ki power substation yn buh noh da ki kor ba katkum kane ka juk kiba long automatic ban pyllait na ka jingthung briew thymmai.
U Sangma u la ong ruh ba ka sorkar ka la ai iaka kti kaba laitluid sha ka MeECL ba kan shim ia ka rai kumno ban leh ban pynioh biang ia ka bai light kaba dang sah la ka dei na ki office sorkar, ki company, ne ki riew shimet la ki dei ki Ht lane Lt ba kan shim ia ka rai ba yn shah ban siew shiteng shiliang ne ba ki hap ban siew shisien siew.