T. 30.30 lak, pyllait pisa ia ki nongtrei kontrak ha Ri-Bhoi

Shillong, 24 Lber:
Ka tnad ka koit ka khiah ka la phah sha ka sorkar ba kan mang pisa T. 30.30 lak na ka bynta ban siew ia ka tulop ia ki 101 ngut ki nongtrei kontrak ba la thung ha ki jaka sumar kiba don ha kylleng ka Ri Bhoi district.
Haba jubab mynta ka sngi Hatmajai hapoh ka iing dorbar thawain halor ka phang ba la wanrah da u Bah Paul Lyngdoh u Bah Hek, u la ong ba kane ka pisa la phah sha ka sorkar na ka bynta ban siew ia ka tulop jong kitei ki nongtrei jong u bnai Nailar 2014 haduh u Rymphang Nailr, 2015.
Kine ki nongtrei ki dei ba la thung kontrak ha ki Nongpoh CHC, Pathar khmah CHC, Umsning, Mawhati, Kyrdem Kulai, Marngar, Umiam kiba don ha Ri-Bhoi.
Shwa, ia kane u Bah Paul Lyngdoh u la pan jingshai ba ki sengbhalang bapher bapher kum ka RBYF, HNYF, KSU, bad FKJGP ki la pynlong ia ka jingrah lama iong ha Nongpoh ban dawa ban thung pura noh ia ki nongtrei ba la thung kontrak.
U la ong ba ka sorkar lada ka don ka lad, ka dei ban pynskhem noh ia ki kum ki nongtrei ba pura jong ka sorkar namar ba la bun kiba la trei bun snem.