T. 1258.18 klur ka surok Shillong-Nongstoin sha Tura

Shillong, 24 Lber:
Ka surok national highway na Shillong-Nongstoin sha Tura ka la long T. 1258.18 klur bad ia kane la iathuh da u myntri ka tnad PWD u Bah Sniawbhalang Dhar hapoh ka iing dorbar.
U Bah Dhar u la ong ba ka jingmang pisa ka long naduh ban tih bad ban siang rong artad bad ha kane ka surok ki don haduh 50 tylli ki lad.
Hynrei ha kajuh ka por, u la ong ba ka jingmang pisa kan shym la kdew ban siew bailutksan hynrei ia kane la pynkhreh da ki Deputy Commissioner bad ka sorkar ka dang ap ia ka kaiphod ban leh ia kaba donkam ban siew ia ka bailutksan sha ki briew kiba shah ktah na ka jingiaid kane ka surok Two Lane.
U la ong ba ka sorkar ka dang pynshong dor ia ki jaka rep kiba shah ktah na ka jingiaid kane ka surok bad kan sa siew hadien ba la ioh ia ka jingkhein jingdiah na ki Deputy Commissioner.
Shw ia kane, u MLA ka Mairang u Bah Metbah Lyngdoh u la ong ka sorkar ka dei ban siew bailutksan sha ki trai jaka ba duh ia ki jaka rep namar ka jingiaid kane ka surok ha katei ka district West Khasi Hills.
U la ong ba ka jingshna ia kane ka surok ka long kaba bha hynrei kaba ma bha haba poi ha ki khongdong namar ba ki kali ki syntuid tang shu kum pynher. “Nga tharai la shna ia kane ka surok ha ka jingsted kaba tang 20-25 km ha ka kynta”, la ong u Bah Metbah.
Hynrei na ka liang u Bah Dhar u la ong ba ka jingshna ka long na ka bynta 40 km ha ka shi kynta.