Bun bnai khlem tulop ki nongtrei Meghalaya House,Kolkata

Shillong, 24 Lber:
U MLA ka Mawlai u Bah Embhahlang Syiem lieh u la buh ia ka jingkylli hynne hapoh ka iing dorbar ba bun ki nongtrei Grade IV ha Meghalaya House ha Kolkata, kim shym la ioh tulop la bun bnai bad kane ka la buh ia ki hapdeng ka jingkhuslai.
U Bah Syiemlieh u la ong, “Nga la ioh ia ka jingtip kaba thikna na ki nongtrei ba kim shym la ioh tulop la bun bnai bad kane ka la buh ia ki hapdeng ka jingeh ban pyndap ia ki jingdonkam ha iing ha sem kiba man ka sngi”.
Hynrei haba jubab halor kane, u Myntri ka GAD u Bah HDR Lyngdoh u la kyntait ia kane bad u la ong ba ka sorkar kam shym la ioh jingtip ba don ki nongtrei bym ioh tulop.
“Ngam shym la ioh jingtip ia kane hynrei lada ka don kum kata, ngan peit ban leh ia kaba donkam”, la ong u Bah HDR Lyngdoh.
U Bah HDR u la iathuh ba la don 68 ngut ki nongtrei ha Meghalaya House ha Kolkata bad nalor  kine, la thung kontrak ruh sa 7 ngut.