Pynrem ka FKJGP, ba arsap ka sorkar

Shillong, 24 Lber:
Ka FKJGP Seng Kmie ka pynrem bad pynpaw ia ka jingbitar ia ka jinglong arsap jong ka Sorkar jylla ka bym shim la niewkor bad burom da kaba pynkhein ia ka jubanlak kaba ka la khlei naduh u snem 2012 bad ter ter ia ki jingdawa jong ki Sengbhalang ha kito ki snem kum ka F.K.J.G.P , K.S.U bad H.N.Y.F kiba la khanglad bad phah khang shisyndon ia ki Special Counter (Facilitation Cell) ha Ophis u Deputy Commissioner namar kane ka long ka jingioh lad jong ki mynder ki bym lah tang ban pyni bad pynshisha ia ki kot ki sla kiba biang bad da kaba thmu ban pynrung ia ka kyrteng ka jong ki ha ka Electoral Roll jong ka jylla.
Kaba sngewsih ban pynpaw la long ba naduh kito ki snem haba pyr shang ban leit khang ia ki bar jylla ban pynrung kyrteng na ka liang ki bor Sorkar ki la ai pynban da ka jing ujor, pyrshah ia ki Sengbhalang bad ka la poi ka jingiakhih ha u Iaiong 2012 haduh ba ka Sorkar lyngba u Myntri Rangbah u la kular bad leh syndon da ka kam ha u bnai Jymmang 2012 ban shahshkor bad sngap ia ki jingdawa jong ki Sengbhalang da kaba khang shi syndon ia ki Special Counter.
Na ka liang jong ngi ki sengbhalang ngi la dawa ba dei ban pynrung beit ia ki kyrteng ha ki shnong ki thaw  bad lyngba ki Dorbar Shnong ha kaba ka Sorkar ka la leh kum ba la dawa.
Ka Seng F.K.J.G.P ka dap da ka jingbitar ban iohi pat ba ha une u snem ba mynta la sdang biang ban pynrung kyrteng ia ki Bar jylla bad haba la pyrshang ban wad jingtip la lap ba 80 – 99 % ki dei beit ki bar jylla kiba wan poi wir ha kane ka Ri.
Ka seng ka pynpaw ruh  ba bun na ki ophisar kiba dei ki Agent jong ka Sorkar ki ju ai daw bad iada ia ki Bar jylla da kaba riehtngen ha ki kyndon jong ka Election Commission jong ka Ri.
Kum ka Seng kaba ju peitngor ban iada ia ka jaidbynriew rit paid ngi dawa na ka Sorkar ba kadei ban pynsangeh mardor ia kine ki jingpynrung kyrteng beain. Ka seng  ka ai ka jingkyrshan kaba pura ia ka Khasi Student Union kaba la peitngor bad buddien ia kane ka kam bad na ka liang ka F.K.J.G.P ngi ai ka kti kamon kti kadiang bad long kiba la pynkhreh ban mih madan bad iaid da kino kino ki lynti kiba tyngeh, la ong u Bah Marbud  Dkhar u Chief Organiser ka FKJGP Central Body.