Shillong: Ka Jaintia Students Union Central Body mynta ka sngi hapoh ka jingialam u President ka seng u samla Jersom Shylla ha ka jingia donlang u Asst General secretary u Samla Nilkee Mukhim, u Finance Secy u samla Tricky Mukhim bad katto katne ngut ki member, ki la beh krad ia ki briew jong ka RECPDCL kiba thmu ban wan jngoh ia ka tnat MeECL ha Jowai.
Ka seng ka buh jingkylli ia ka sorkar ba kumno kine ki briew ki wan shapoh Jaintia, ha kum kane ka por ba dang mad ia ka khlam Covid- 19, hynrei pynban kine ki briew ki ioh ban wan katba mon sha kane ka District jong ngi.
Ka seng ka sngew ba haba kiba bun na ki nongmihkhmat bad ki sengbhalang ki pyrshah ban lilam ia ka MeECL, hynrei pynban kine ki briew jong ka kompani ki wan beit shane bad la shim, ba ka lah ban don kaei re kaei ka jingthmu jong ka Power Dept sha lyndet, ha kaba na ka liang katei ka seng kam ailad satia ia ka jingbuit poh jong ka Power Dept.
Ka seng ka ban jur ia ka sorkar jylla ba kan weng ia ka jingthmu ban lilam ia ka MeECL sha ki kompani Shimet bad ka seng kan iai bteng ban pyrshah jur ia kane bad lada ka sorkar kam patiaw satia, ka seng kam banse ban pynlong da ki jingiakhih.
Phi don ban ong eiei?