Pynsangeh dorbar biang u Lamphang

Shillong, 19 Lber:
U Lamphang ka iing dorbar u AT Mondal mynta ka sngi u la hap ban pynsangeh shwa ia ka dorbar kumba 2 minit eiei namar ba kam biang briew. Kane ka la jia biang hadien ba ha kine ki sngi ba la dep, ka la don biang kum kane ka jingjia ha kaba la hap ban pynsangeh ia ka dorbar bym biang ka jingdon briew hapoh ka iing dorbar.
Hynne ka sngi ruh, ka la jia ha ka por ba u James K Sangma u dang kren ia ka phang kaba iadei bad ka IDBLP ha ka por kumba 12:40 PM eiei, u Lamphang u la bthah ia u James ba un sangeh shwa namar ba ka iing dorbar ka duna briew. “Ka iing ka duna ia ka jingdon briew, nga la phah tied ia ka baje”, la ong u Lamphang.
 Ha kane ka por don tang 8 ngut ki MLA kiba kynthup u Bah Rowel Lyngdoh, Zenith Sangma bad u Salseng Marak na liangsynshar bad u Dr Donkupar Roy, u Bah Paul Lyngdoh, u Dr Jemino Mawthoh, James K Sangma bad u John Leslee Sangma na ka liangpyrshah.
Hadien khyndiat por ba la tied baje, la wan rung ki katto katne ki dkhot ka liangpyrshah kynthup u Bah Titos W Chyne, Bah Embhahlang Syiemlieh bad u Bah Witting Mawsor ban pyndap ia ka jingduna briew ka iing.
U Lamphang u la bthah biang ia u James K Sangma ban bteng ia ka jingkren jongu kaba iadei bad ka jinghiran bording ha kane ka jylla.