Iaroh ki longkmie ia u MLA, ba urlong ka jaka sumar Covid-19 ha Patharkhmah

Nongpoh:Ha ka sngi kaba u MLA Jirang, u la leit ban plie paidbah ia ka jaka sumar ia kiba pang Covid-19 ha Patharkhmah, ki nongialam sengbhalang ha Ri Bhoi Sepngi lem bad ki seng Longkmie, ki la ai ka jingkhublei kaba kyrpang eh ia u Bah Sosthenes Sohtun, MLA Jirang, namar ka jingshikhia jong u ban pynurlong ia ka Carona Care Centre ne ka jaka sumar pang Covid-19 ha Pathar khmah, kaba dei kawei na ki jaka ba longpdeng na baroh ki shnong ha Ri Bhoi Sepngi.

Haba plie paidbah ia katei ka Corona Care Centre ne ka jaka sumar pang Covid-19 ha Patharkhmah, nalor u MLA kiwei pat kiba la donlang ha katei ka sngi ki kynthup ia u Bah Victor Ranee MDC Jirang, Bah D Syiemiong BDO Jirang C&RD Block, ka Dr E Kalwing Incharge Patharkhmah CHC, u Bah N. Kharmalki Sordar ka Patharkhmah, ki nongialam sengbhalang, shnong, longkmie, samla lem bad kiwei.

Haba iadei bad katei ka jingplie paidbah ia katei ka jaka sumar ia kiba pang Covid-19, ki briew na katei ka thain, kiba kynthup naduh ki nongialam sengbalang, Longkmie bad seng samla, ki la pynpaw ia ka jingkmen kaba khraw eh halor katei ka jingulor katei ka jaka sumar ia kiba pang Covid-19 bad halor katei, ki la ai ka jingiaroh kaba khraw eh ia u MLA Jirang, namar ka jingshim khia jong u ban pynurlong ia katei ka jaka sumar ia kiba pang Covid-19.

Ka jingkren ha katei ka sngi, ka long ban kyntiew beit ban kyntu ia ki paidbah ha katei ka thain, ba ki dei ban long phikir ialade khnang ba kin lait na ka jingpang Covid-19. Ha kajuh ruh ka por la ioh ia ka jingkren na ki nongialam sengbhalang, Longkmie bad samla, kiba la kyntu jur ia ki paidbah ha katei ka thain, ba ki dei ban shim bynta ha ka ban leit shah injek ialade, namar kumba ka long mynta katei ka thain ka dei kawei na ki jaka kaba dang duna eh halor ka jingshim bynta ki briew ha ka ban leit shah ai Injekshon Covid-19 ialade.