Khluit ka dorbar, namar u pulit batbor

Shillong, 17 Lber:
Ki dkhot ka liang pyrshah mynta ka sngi ki la takrain tyngeh ia ka sorkar jylla ka bym lah ban kem ia u Sub Inspector  u Nirul Islam uba la donkti ban leh beijot ia ar ngut ki kynthei ha Ampati ha u snem 2013.
U MLA ka NPP u James K Sangma u la ong ba ka jingbym lah ka sorkar ban kem ia u pulit SI u Nirul Islam ka pyni ba ka sorkar ka la tlot ha ka jingtreikam. U la ong ba ka long kaba lyngngoh wat hadueh shi snem tam, une u heh pulit um shym la shah kem bad u la phet rieh na kti ka ain.
Ka sorkar ka dei ban shim ia ki lad ki lynti kiba tyngeh ban kem noh ia une u heh pulit khnang ban ioh biang ia ka jingshaniah ia ki paidbah, la ong u James.
U James u la ong ba u Islam u la phet rieh la slem bah naduh ba u la shah thwet ha ka ain namar ki kam runar ba kynsha jongu. Lada ka sorkar kam lah ban kem ia u, kan buh ia ka jingshaniah jong ki paidbah ha ka jingartatien ia ka tnad pulit, la ong u James.
Katba na ka liang ka myntri kam pohiing ka Kong Roshan Warjri ka la ong ba ka sorkar ka la sam ka jingbthah sha baroh ki SP ka jylla, ka Assam bad ka India ki registrar ka Assam ruh, ki Commandant CISF, LGB, International Airport, North East Frontier Railway, bad ia u Regional Passport Officer, Dispur, Assam nalor ka jingpynmih ia ka jingpynbna paidbah ha ki kot khubor ka Meghalaya bad ka Assam, ban buddien ia une u heh pulit runar.
Hynrei na ka liang u James, u la kylli hato ka sorkar ka la sangeh noh ban thwet ia une u pulit, na ka liang ka Kong Warjri ka la ong kam long kumta bad ka sorkar ka dang iai thwet ban kem ia une u heh pulit.
U James u la kwah ban tip ruh la ka tnad pulit ka don jingthmu ne em ban ai khusnam ia kiba ai jingtip ia u Nirul Islam, na ka liang ka Kong Warjri, ka la ong ba ka sorkar kan leh ia kaba donkam halor kane ka jingai jingmut u MLA ka NPP.
Na ka liang u MLA ka UDP u Bah Paul Lyngdoh u la pan jingtip ki don katno ki pulit bym dei na Meghalaya namar ba katkum ka jingtip  u Nirul Islam u dei na Barpeta, Assam. Halor kane, ka Kong Warjri ka la ong ba kan peit ia kane.
Katba ia ka jingkylli na u Dr Donkupar Roy uba kwah ban tip ia ka jingtip halor u Nirul Islam, ka Kong Warjri ka la ong ba kan pynbiang ia kane hapoh ka iing.