Shah kem 2, ba ai pisa sha ki GNLA

Shillong, 16 Lber:
Hadien ba la ioh ka jingtip ba thikna ba ki don ki briew kiba thmu ba leit ia kynduh ia ki dkhot ka GNLa kiba don mynta hapoh Shillong District Jail, ki pulit ka Special Cell ki la buddien bha ia katei ka jingioh jingtip jong ki ha kaba ha ka por 10:30 baje mynstep ki la ioh ban kem ia ar ngut ki samla kiba thmu ia kynduh ia ki GNLA ha phatok, la kem ia ki na phyllaw ka District Jail, Shillong. Kitei ki ar ngut kiba la shah kem ki dei kiba la tip kyrteng kum u Amar Thapa, 20 snem karta na Dudnoi Bak hrakhuti , Goalpara bad uwei pat u Niksang Marak 18 snem karta na Rangra , Baghmara, na kitei ar ngut ki pulit ki la ioh kurup ka pisa T.50 hajar tyngka, bad hadien ba la shah kem ki la phla ba ia katei ka pisa ki la thmu ban pynpoi sha ki dkhot ka GNLA kiba don hapoh phatok.
Kham hadien, ki pulit ki la leit ban khynra hapoh phatok, ha kaba la set ia ki dkhot ka GNLA kiba la shah kem, bad ha katei ka jingleit khynra ki la ioh kurup ia ki Simcard kiba dei jong kitei ki ar ngut kiba la ai ban pyndonkam u William A Sangma, u dkhot ka GNLA uba don ha phatok uba dei na Bakrapur, Baghmara, u Anthony P Marak, 27 snem uba na Rajai Borsora, u Johny A Marak 22 snem karta na Boldak Ading , Tura. Lashai ka sngi ki pulit kin leit rah sha kashari ban pan jingbit ba tohkit ia kitei ki briew ha along pulit, u wei na ki u William u dei uba la wanrah na Tura Jail bad u la shah kem, namar ka jingdawa pisa, na kawei ka kynthei ha nongbah Shillong lyngba ka phone.
Halor katei ka jingioh lad ki dkhot ka GNLA ban pyndonkam mobile hapoh phatok ki pulit ki la suba jur ba ka dei lyngba ka jingiasuh buit bad ki nongtrei phatok, bad ki la rah ia ar ngut ki nongtrei ba la tip kyrteng kum u Phrangsngi Kyndiah bad u Rupam Kuri bad shen kin pynshisha la ki tei ar ngut ki donkti ne-em ha ki kam buit tuh bad ki dkhot ka GNLA ba don ha Jail.