Pynshlur ka sorkar ban iaphet lok, ong U MLA ka Nongthymmai

Shillong, 16 Lber:
U MLA ka Nong thymmai u Dr Jemino Mawthoh u la pynpaw ia ka jingsngew lyngngoh ba ka sorkar ka la ai skhim ia kito ki longkmie kiba iaphet lok lyngba ka Chief Minister Scheme for Social Assistance.
“Kane ka skhim ka sorkar ka long kumba pynshlur ban iaphet lok bad kam long kaba iahap”, la ong u MLA ka Nongthymmai haba wan rah ia ka jingkylli hynne ka sngi hapoh ka iing dorbar.
”Nga sngew ba kane ka jingai skhim ia kito kiba iaphet lok kan pynshlur ia ki kynthei ban iaphet lok. Namarkata, nga kwah ban tip kaei ka daw ba ka sorkar ka ai skhim ia ki longkmie ba iaphet lok”, la ong u Dr Mawthoh.
Haba pynksan nia ia kane,  ka Myntri ka Deborah Marak ka la ong ba kam iahap ia kane ka jingong jong u MLA ba kan pynshlur ban iaphet lok.
”U Myntri Rangbah u la shim ia kane ka rai ban ai skhim ia ki longmie ba iaphet lok namar ba ki dei hok ban ioh skhim namar ba ki dei na ki longing ba duk”, la ong ka Marak.
Haba jubab ia ka jingkylli u Dr Mawthoh, ka myntri ka la ong ba ka kyndon ba kongsan jong kane ka skhim ban ioh ka long ba ka longing kam dei ban palat ia ka jingkamai T.12000 shi snem.
Ka la pyntip hapoh ka iing ba ki don 48,234 ngut kiba ioh ia kane ka skhim kynthup 23309 ngut kiba duna dkhot met, 24409 ngut kiba iap lok bad kiba iaphet lok bad 7043 ngut kiba long marwei.