Ki don kiba ong, ba u corona, u dei uba shu thok, uba shu thaw mangi, ong U DHS

Shillong: U Dr A War, DHS (MI) jong ka sorkar jylla, hynnin ka sngi, ula ther tyngeh, ia kito kiba kren pyrshah ia ki doktor ka jylla, ha kaba ki la kynnoh ruh, ba u corona, u dei uba thok. “Ngi lah ong, ba dei ban bud ia ki kyndon, hynrei ngi iohi, ba ki don kiba ong ba une u corona, u dei uba shu thok bad uba shu thaw mangi, lada dei kaba shu thok, ngin leh aiu, ban shu ia shong kai” ong shuh shuh U DHS.

“Nga kyrpad ia baroh, ban nym pynmih ia ki jingkren kiba bakla, khlem da pyn thikna bad lada ngi don ia kino kino ki jingdkoh, kumta, ngim dei satia ban buhrieh” ula ong shuh shuh.

Ha ka jingiakren bad ki kotkhubor, hynnin ka sngi, U DHS, ula iathuh ruh shaphang ka kong Manisha Turnia, kaba la khlad noh ha ka 30tarik Jymmang 2021, ka dei kaba don ha ka jingtrei miet ha Ganesh Das Hospital, ha ka 18,19 bad 20tarik Jymmang 2021, ong U Dr A War, DHS (MI), ka sorkar Jylla.

Hadien ka jing trei miet, ka ioh shuti bad ka dei ban sdang trei kam biang, ha ka 23tarik Jymmang, hynrei ha katei ka sngi, ka pyntip, ba kam da khlain bad kumta, ha ka por janmiet, ka la wan sah noh sha hospital, ban shah sumar kham bha ialade.

Ka tang shu mar ia poi, la test da ka RAT, ha kaba ka pyni, ba kam don jingpang covid satia, hynrei ha kajuh ka por, la test da ka RT PCR bad la pyni, ba ka don ia ka jingpang covid, hynrei ka khlad noh ha ka jingshah sumar, ha ka janmiet jong ka 30tarik Jymmang 2021.
La iathuh, ba ha katei ka jaka ba ka trei kam, ym don mano mano ruh, ba ioh positive bad katei ka pyni, ba ka lah ban iabit jingpang, na shabar jong ka hospital, lane na iew na hat.

U Dr War, u iathuh ba kiba ha iing, kim shym la ujor satia, halor ka jing iadei bad ka jing bym ioh shuti jongka, ha kaba la iathuh ba kam shym la pan shuti ruh, da ka jingthoh, na ka bynta ban shim shuti bad u Dr War, u ong “Lehse, ka iohi, ba kiwei pat ki paralok jongka, ki ia bunkam ha kine ki sngi”.
U Dr War, u ong ruh ba kiba ha iing, ki sngewsih palat, ba ia kane ka jingjia, la pynmih ha ki social media, kaba la wan rah ia ka jingkhia mynsiem bad la ong shuh, ba kam don ka jing kynnoh ba ka hospital, ka leh bein, lane ba ka matron kam sngap ia ka jingkren jong katei ka nos, ka dei kaba bakla.
U DHS, u sngewkhia ruh, ba ka jingbatai jong ki briew, ki bym tip eiei halor ka jingtrei kam jong ki hospital, da kaba ki kren pyn budnam ia ki bad kane ka dei kaba sngewsih shi katdei, ula ong shuh shuh.