Kyndit u myntri ka sorkar Bangladesh, ba shah knieh mobile ha Dhaka

DHAKA: Ha ka sngi U Blei ba ladep, u myntri jong ka sorkar Bangladesh, ula kyndit, haba ula shah knieh ka mobile phone na ka kti jongu bad kata ruh, ka dei, ha ka por, ba u dang iaid da ka kali sorkar jongu hi ban leit phai sha iing.

U M A Mannan, myntri ka sorkar Bangladesh, uba dei peit ia ka tnat Planning, u dang browse ia ka mobile phone jongu, ha kaba u shong hadien jong ka kali bad u plie ruh ia ka jingkhang iit jong ka kali, hynrei khlem poi pyrkhat, ula shah knieh noh kynthet ia ka mobile phone na ka kti.

“Hangta nga la kyndit bad lyngngoh, hynrei katba ngan da sngewthuh, ba nga la shah tuh ia ka mobile phone, u nongtuh, ula phet jngai bak” ong utei u myntri, haba kren sha ki kotkhubor mynta ka sngi.

Mar kumta, ula phah leit beh ia u pulit, uba pahara ia u, hynrei, um lap beh thong shuh, namar ba u nongtuh, ula phet shajngai bah.

Katei ka jingjia, ka dei ha ka janmiet jong ka Sngi U Blei, ha kaba u myntri, ula mih na ophis bad u sahkut ha ka jingdheng kali ha ka surok bah Bijoy Sarani, kaba la ju tip ruh, kum ka jaka, kaba ki bun bha, kiba ju kloh pla ha katei ka jaka.