Na ka kali kit nongpang, kurup ki pulit, da shi kali ka kyiad phareng

Nongpoh: Myn hynnin ka miet ha ka por 11 baje eiei mynmiet, ki Pulit ka Byrnihat Police Outpost, ki la ioh ban bat ia kawei ka kali kit Nongpang (Ambulance) kaba don ia u number ML-10-C-3475, ka Ambulance kaba kit shi kali ka Kyiad.

Katei ka Ambulance, ka dei na ka shnong Umran Niangbyrnai, Ri Bhoi. La ong ba ka nongrim kaba la pynlong ia ki Pulit ba kin iohbat ia katei ka Ambulance, ka dei namar ba ki la ishankhmat ia ka rukom iaid katei ka Ambulance, kumta haba ki la pynsangeh haba la talasi shapoh katei ka Ambulance, la lap pynban shibun ka Kyiad.
Katei ka Ambulance ka la kit Kyiad na ki jaka ka thain Byrnihat, da ka jingthmu ban pynpoi sha ki thain Umsning, hynrei ha ka por ba ki thmu ban kiew, haba la poi ha Byrnihat Police outpost, ki Pulit ki la ioh ban bat noh.

Hapoh katei ka Ambulance ki don lai ngut ki briew, ia kaba ki Pulit ki la kem noh ia ki bad ba kin pynlong ia ka jingtohkit namar ba katei ka jingkit Kyiad beain bad khamtam ba ki la shim kabu ban kit hapoh ka kali kit Nongpang.