Kiew sa kiba ioh ia ka jingkoit na ka jingpang Covid-19 ha kaba ki don haduh 890 ngut, kiba pang pat 613 bad kiba khlad 7 ngut

Shillong: Hadien ba ka jylla Meghalaya ka la shah tap ha u lyoh u ba dum ha kine ki bnai bad ha kine ki sngi kiba la leit noh hadien ba ka khlam Covid-19 ka la wan ban lynshop biang sa shisien ha ka kynti kaba ar haduh ba da ki spah ngut ki paid nongshong shnong ki la ioh ia kane ka jingpang bad da ki phew ngut ruh ki la duh noh ia la ka jingim ha kane ka khlam hynrei mynta ka sngi ka 29 tarik u Jymmang 2021 ka long kaei kaei ka jingsngewtynnad bad ka jingsngew don jingkyrmen ban iohsngew ba kane ka jingpang Covid-19 ka la sdang ban hiar katba dang mih ki sngi bad la sdang nang bun pat sa kiba ioh ia ka jingkoit jingkhiah na kane ka jingpang. Katkum ka jingtip ba la ai da ka tnad ka koit ka khiah, kiba ioh thymmai ia kane ka jingpang ha kine ki 24 kynta ki don kumba 613 ngut bad kiba la ioh ia ka jingkoit na kane ka jingpang pat ki don haduh 890 ngut bad kiba la khlad noh pat ki don 7 ngut.

Napdeng kitei ki 613 ngut kiba la ioh pang thymmai, 19 ngut ki dei napoh East Garo Hills, 12 ngut ki dei napoh East Jaiñtia Hills, 320 ngut ki dei napoh East Khasi Hills, 28 ngut ki dei napoh North Garo Hills, 87 ngut ki dei napoh Ri Bhoi District, 5 ngut ki dei napoh South Garo Hills, 17 ngut ki dei napoh South West Garo Hills, 11 ngut ki dei napoh South West Khasi Hills, 74 ngut ki dei napoh West Garo Hills, 23 ngut ki dei napoh West Jaiñtia Hills, 17 ngut ki dei napoh West Khasi Hills.

Napdeng kitei ki 890 ngut kiba la koit na katei ka jingpang, 9 ngut ki dei napoh East Garo Hills, 13 ngut ki dei napoh East Jaiñtia Hills, 535 ki dei napoh East Khasi Hills, 205 ngut ki dei napoh Ri-Bhoi District, 16 ngut ki dei napoh North Garo Hills, 9 ngut ki dei napoh South Garo Hills, 13 ngut ki dei napoh South West Garo Hills, 6 ngut ki dei napoh South West Khasi Hills, 52 ngut ki dei napoh West Garo Hills, 18 ngut ki dei napoh West Jaiñtia Hills, 14 ngut ki dei napoh West Khasi Hills.

Kiba la khlad noh na kane ka jingpang ha kine ki 24 kynta ki don 7 ngut ha kaba 5 ngut ki dei napoh East Khasi Hills, 1 napoh Ri Bhoi District bad 1 napoh South West Garo Hills.