Shah siat ki arngut, kiba bat bor kynthei, ba ki mut phet krad na ki pulit ka Bengaluru

Ar ngut na kiba donkti ban leh jot ia kawei ka kynthei bad kiba la shah kem ha ki pulit jong ka Bengaluru, ki la shah siat na ki kjat jongki, haba ki thmu ban phet tuh, na ki pulit, mynta ka step.

Kitei ki arngut, ki thmu ban phet krad mynta ka sngi, ha ka por 5baje mynstep, haba ki pulit, ki leit ialam ia ki, sha ka jaka jong ka jingjia, ba kin ring dur biang ia ka jingjia, kaba la dep jia ha kawei ka iing ha Bengaluru.

Ynda poi ha katei ka jaka, kitei ki arngut, ki thmu ban phet bak na ki pulit bad ki pulit, ki la siat na ki kjat jongki ba kin nym lah shuh ban phet krad. La leit kit ia kitei ki arngut sha hospital, ba kin shah sumar, ong ka khubor.

Ki don 5ngut kiba shah kem, ha ki pulit jong ka Bengaluru bad ki dei baroh 5ngut na Bangladesh bad kitei ki la shah kem, namar ba ki leh niewbein ia kawei ka kynthei, kaba ki wan ialam hi na Bangladesh, ha kaba ki la law lyngkhuit ia ka bad ki la bat bor ruh ia ka bad katei ka video, ka la saphriang kylleng kylleng ha ki khyndiat sngi ba ladep.