Pyllait paidbah ka RBYF ia ar-tylli ki kali kit nongpang

Nongpoh: Kum kawei na ki kynhun sengbhalang ha Ri Bhoi, ka Ri Bhoi Youth Federation (RBYF), hynnin ka sngi ka la ioh ban pyllait paidbah ia ar-tylli ki kali kit Nongpang (Ambulance), ki ban sa shakri ia ki paidbah ha Ri Bhoi bad khamtam eh ia kito ki briew kiba donkam kyrkieh ia ki Ambulance.

Ia katei ka Ambulance ka RBYF, la pyllait paidbah hynnin ka sngi ha Umsning CHC bad kiba la donlang ha katei ka sngi ki kynthup ia u Bah Jason Sawkmie Mawlong, MLA ka Umsning Konstituensi, nangta ka Kong RM Kurbah, DC Ri Bhoi, u Dr. M Mawrie, DMHO, u Bah Raja Brahma, BDO ka Umsning C&RD Block, u Bah Bipul Thangkhiew, President ka RBYF, Sengkmie, u Bah D. Warjri, President ka RBYF, Umsning Circle lem bad kiwei ki nongkitkam kiba hakhmat ka RBYF.

Kiba ai jingkren ha katei ka sngi, ki la ai ka jingiaroh kaba khraw eh ia ka RBYF, kaba la shimkhia ban pynioh ia kitei ki Ambulance, da ka jingthmu ban ai jingiarap ia kito ki paidbah kiba donkam Ambulance bad kaba long ruh kum shi bynta ban shakri ia ki paidbah kiba donkam jingiarap.