Haba ka khlam, ka ban jur, ym don nong iarap, ong ka MLA Congress

Shillong:Ka MLA jong ka seng Congress, ka Dr Ampareen Lyngdoh, ka la buh ia jingkylli ia ka sorkar jylla, ba mynshem snem ka la don ka jinghikai ka ba biang eh ban iakhun pyrshah ia ka khlam, hynrei mynta u snem balei ka sorkar kam pyntrei kam ia kine.

Haba iakren bad u Rupang, na ka liang ka MLA, ka la ong ba mynshem snem ka sorkar ka la leh kyrkieh ban ai jingiarap ia u paidbah, hynrei mynta u snem haba kane ka khlam ka la ban jur ka sorkar ka sngap jar, ym don nongiarap, ym don nongtyrwa bad ym don nong pyni lynti bad baroh ki dah ha ka umdum ka ba khraw.
Ka Dr Lyngdoh ka la ong ba haba ia kren ka poi biang sha ka jingiakren kaba la dep ban iatai naduh mynshem snem ha ka ba la don ka jingai jinghikai ka ba biang tam ban ialeh pyrshah ia ka khlam, hynrei mynta u snem la iohi ia ka jingshimsting jong ka sorkar.

Ka la ong ba ha kaba ia dei bad ki briew ba ioh khaw ration, bun na ki nongshong shnong kim ioh ia ka card ration ka daw jong kane ka long ba kat kum ki kyndon jong ka sorkar India ban ioh card ration ka dei ia ki briew bym don ing sem, hynrei kat kum ka riti dustur u khasi ki bun na ki nong shong shnong ki dei ki ba don ing namar ba ki ioh pateng, hynrei kane kam mut ba ki biang ia ka kamai kajih bad halor kane la dep ban ia kren shi ia kren hynrei kam don ka jingshimkhia.
Ka jingpynbna jong ka sorkar ban pynbiang ia u khaw ration ruh ym tip iano une u khaw kin ai namar ba une u khaw ioh ei, u dei tang na ka bynta ki card BPL bad AAY, hynrei ha sor kaba kane ka khlam ka la ktah jur kum ba 80 % ki nong shong shnong ki don ia ka APL card bad tang kumba 30 % ki ba don ia ka BPL bad AAY card ka la bynrap.

Ka kong Ampareen, ka la ong ruh ba na ka liang jong ka sorkar haba leit ban twad jingmut halor ka jingeh jong ki paidbah ka pynlong kam kai noh da kaba ong ba bam noh tang kumta, yn nai bam shuh kumta bad kane ka pynduh jingkyrmen ia u bun balang, namar ba lada dei u nongkyndong ne u nongsor ruh haba ym ioh ka lad ban kamai ka wanrah jingsaja ka ba shyrkhei bad ka sorkar kam shem la pynkhreh ia kine baroh.

Ka kong Lyngdoh, ka la pynpaw ruh ba kum ki MLA ki kwah ban iarap ia ki nongshong shnong, hynrei kaba eh ka long ba naei yn thied ia u ta u khaw haba khang dam lut baroh, namar ba wat ban thied ia ki marbam mardih ha ki ingiap briew ruh ka shem jingeh bha, na ka ne ka jingkhangdam bad ka la kyntu ia ka sorkar ban pyni ia ki lad ki lynti halor kane ka bynta namar ba ki don hapdeng ka umdum ba khraw.