Shu sah tang jingkynmaw

E.W. Kharsahnoh
Mawroh, 21052021

Ka arphewwei tarik Jymmang Arhajar Arphewwei,
Sa uwei pat Kaitor bapaw u khlad noh na pyrthei;
Ki sngi ki ïa jingim u briew, um lah te ban ryngkang,
Ka mon Bakhuid U Trai Nongthaw, ba U la buh la mang.

I Bah Rana jait Kharkongor, u simpah u simsong,
U rang biria, ‘tien kit jingmut, ha sur ba bun ki rong;
Na sla pyrthei phi la her noh sha kawei pat ka ri,
Sa tang ha rngai ki jingphohsniew yn ïashem pat bad phi.

Ki sur tynrai jong ka hyndai ne ki sur nongmynta,
Sur lum sur wah ba phi ju rwai, lyngai kin ïai sawa;
Ka sap ka phong ba la pynkup U Nongbuh U Nongthaw,
Phi khlem buhrieh hapoh kyndong, sha pyrthei phi pynpaw.

La u synñiang phi la pynnoh, lyngkha ka rwai ka siaw,
Kumno ïa ki yn ym ïaroh wat la mynsiem ka diaw;
Tang jingkynmaw te kin ïaisah, lawei, pateng pakit,
Ha thup nongrwai barim bajah, ban klet ïa phi ym bit.

Pyrthei pang khlam ba kum kane ban ïamih ruh ym ioh,
Toi ha ka jingshisha la dei ban tuid baroh baroh;
Ban ïoh pyndonburom khadduh da mynsiem jingsngewlem,
Ban ïoh kyrkhu kyrdoh kumjuh, kiba haïing hasem.

Jingduh bakhraw ka jaitbynriew ha liang ka rwai ka siaw,
Da kumno kein kylliang ban siew? Shu sah tang jingkynmaw;
Katto jingpang shitom la duh, jynjar khuslai la lait,
To khie leit suk sha l’U Nongthaw, mynsiem kan ioh jah thait.