Ka thma hapdeng ka US bad ka China, ka ap mynta sa sha suin bneng

Ka thma hapdeng ka United States bad ka China, ka la kiew mynta sa sha suin bneng.

Ka Pentagon, ka kren sngewkhia jur ha kine ki sngi, ba ka China, kan leit ban shna ia ka steshon jongka ha suin bneng bad katei, la shim ba kan dei ka jingma kaba khraw ia ka jingshngain jong ka America. La iathuh ba ka Beijing, ka dang pynkhreh ia katei ka steshon jongka, ha ka haw haw, kaba khia haduh 66 ton.

Katei ka steshon, kan sdang trei kam ha u snem 2022 bad yn tip, da ka kyrteng Tiangong station bad ki stad haw haw jong ka China, kin don ha katei ka jaka, na ka bynta shiphew snem kynthih ban pule ia ka jinglong jingman jong ka haw haw.

Kat haduh mynta, ka don tang ka International Space Station, ha kaba ka China, kam don bynta satia. Katei ka steshon jong ka China, kan don ha ka jingjngai kaba 340 haduh 450km (210-280 miles) na ka pyrthei bad katei kan ktah bha ia ka jingshngain jong ka America.

Ka China, ka la dep pynher ia ar tylli ki liengsuin jongka ha ki snem ba ladep, ha kaba la tip, kum u Tiangong-1 bad u Tiangong-2. La iathuh ba U Tiangong, u don ka jingheh kaba 16.8metre ka jingjrong bad nangta sa 4.2metre ka pyngkiang bad u lah ban pynshong ia hynniew ngut ki briew ha katei ka liengsuin.

Ha ka 15tarik Jymmang, ka China, ka la ioh ban leit buh ia U Zhurong, ha u met bneng Mars bad ka dei tang ka Ri, kaba ar ha ka pyrthei, ban leit buh ia ka jhad ha u met bneng Mars.