Ka jing ialeh, ka la sdang hapdeng ka Israel bad ki ehrang Hamas bad kitei ki ehrang, ki dei kiba khlain bor bha, ha kaba ki don ia ki namding, ki roket bad kiwei ki tiar ialeh, kiba shyrkhei bha, ba ki la nud ban ialeh pyrshah ia ka Ri ba marjan jongki.
Don ki ban pyrshah bad ki bym pdiang ia ka jingleh jong ka Israel, hynrei, ki hap ban sngewthuh, ba ka Israel, kam shym iakhun bad ka Ri Palestine lane bad kano kano ka Ri, hynrei, ka la pyniap ia ki 20ngut, kiba dei ki nong ialam ba ha khlieh duh jong ki ehrang Hamas bad katei kam iapher, na kaei kaba ka India, ka ialeh pyrshah ban pynduh ia ki ehrang, kiba pynthut ia ka suk ka sain jong ka Kashmir, lane kumba ka India, ka ialeh pyrshah ia ki Maoist lane ka India, ka ialeh pyrshah ia ki ULFA bad ter ter.
Ki ri Muslim, ki iakren mynta, halor ka jing thombor jong ka Israel, ia ka Palestine, hynrei, ngi iohi, na ki jing shisha, ba wat ka India, ka leit kthong ia ki ehrang, haba ki thaw ktem ha Pakistan bad kumta, ka Ri Palestine, ka la dei ban weng ia kitei ki ehrang, kiba thombor ia ka synshar khadar jong katei ka Ri bad kiba pynlong ia u maw jynthut, ha ka jing iadei jongki bad ki Ri, ba marjan (lada jia ba kim pynsyaid hi ma ki, ia kitei ki bsein).
Ngin dang ia peit, ia kaei kaba ka United Nations, lane ki ri Muslim bad ki ri ka pyrthei, ki pyrkhat halor kane; hynrei ka US, ka la kren shai, ba ka Israel, ka hap ban iada ialade, na ka jingthombor jong kitei ki ehrang, kiba shong mar syndah jongka bad lada jia pat, ba ki Ri Muslim, ki kyrshan ia ki Hamas, kumta, kin kyrshan ruh ia ki Hezbollah bad kumta, kin pyniaid ia ka jing synshar, da kaba kin pynsyaid ia kitei ki seng lehnoh.
Ki ri Muslim, lane ki Ri Africa lane kiwei pat ki ri jong ka pyrthei, ki la dei ban sngewthuh bha, ia ka jingim kordit, kaba ki la mad, na ka jingdon ka Al Qaeda, ka jingdon ka ISIS bad ka jingdon ka Boko Haram, nangta ka jingdon ka Taliban, kaba la pynjot thiaw ia ki Ri jong ka pyrthei bad kitei ki la sdang ruh ban knieh noh ia ki sorkar ha Iraq, ha Syria, Afghanistan Libya bad ha kiwei pat ki Ri.
Na ka jing shisha, la iohi, ba kitei kim don ia ka jingthmu, na bynta la ka jong ka jaitbynriew lane na bynta, la ka jong ka niam, hynrei ki don tang ia ka jingthmu ban pyni, ia la ka jong ka bor lah duh, kaba tang shipor, hynrei, ka bym larkam satia haei haei ruh.
Phi don ban ong eiei?