Pynieng nar elektrik ka Assam ha New Balakhawa

Shillong, 3 Lber:
Ka sorkar Assam ka dang iai bteng ban wan skud jaka ha khap pud ka jylla Meghalaya bad dangshen ka la leit pyn ieng syndon da ki nar elektrik ha shnong New Balakhawa, Nongspung Syiemship, Ri Bhoi District.
U Bah Michel Warjri u Executive Secretary, ka Hima Nongspung ula ong ba katei ka la jia ha ka 25 tarik u Rymphang ba ki briew na Assam ki la wan ban thung jubor ia ki nar elektrik ha katei ka shnong kaba hap hapoh ka Jirang C&RD Block, Ri Bhoi District.
Halor kane ula ong na ka liang ka Hima, u Pa’iem Petrick Syiem iong, Syiem Hima Nong spung ula leit ban ujor mar mar sha ka Deputy Com misioner, Ri Bhoi District ban pynsangeh noh ia ki nongtrei ka Asaam bad kyrpad ba kin weng noh ia ki post bad ki tiar baroh namar ka long pyrshah ia ka sorkular kaba la iasoi hapdeng ka sorkar Meghalaya bad Assam.
U Bah Warjri ula ong ba ki pulit ryngkat u AEC i/c Patharkhmah Administrative Unit ki la leit ban jurip ia katei ka shnong ka 27 tarik u Rymphang hynrei ki briew ba trei napoh Assam ha katei ka sngi ki la phet noh. “ Tang mar ia leit ki pulit bad u AEC ki nongtrei ka Assam la wan biang bad haduh mynta ki dangiai bteng ban trei ia katei ka kam,” ula bynrap.
Kum ban shu pynkymaw na ka liang ki samla pule, ka KSU-NH Ri Bhoi District, ki la leit ban jurip ia katei ka shnong bad dawa na ka sorkar ban pynsangeh ia ki nongtrei bad buh da ka Police Out Post na bynta ban iada ia ki paidbah ha katei ka thain khappud.