Ka sngi ban ai tika corona, yn sa pyntip ha ki mobile phone

Shillong:U Symbud Myntri rangbah ka jylla u bah Prestone Tynsong, u la iathuh ba na ka liang ka tnad ka koit ka khiah kin sa ai jingtip ha ki mobile phone jong ki briew ba la dep register, ia ka sngi bad ka por ban ioh Tikka.
U bah Tynsong u la iathuh ba ban kiar na ka jingialum ha ki jaka ai tika, ka tnad ka la pynbeit ba kin sa ai jingtip lyngba ka mobile Phone ia ka sngi ba ka por ia ki briew ba la dep register ban ioh tika.

U bah Tynsong, u la iathuh ba ki briew ki ba 18 snem ka rta haduh 44 snem ka rta ki ba don jingthmu ban ai vaccine ki la bun kiba la dep register ia lade bad ia kane la lap hadien ba la plie ia ka portal.

“Hynrei ban weng na ka jingialum ki briew ha ki jaka ai Vaccine ka tnad ka la pynbeit ia ka sngi bad ka por ia ki briew ba la dep register ba kin wan ai Tikka bad ia kane yn sa phah jingtip ha ki mobile phone jong ki,” u la ong.
U symbud myntri rangbah u la iathuh ba kine ki 42,000 tylli ki vaccine kin dei na ka bynta ki district headquarter kaba kynthup ia ka East Khasi Hills District, ka Ri Bhoi District,ka West Khasi Hills District,ka East Jaintia Hills District ,ka West Jaintia Hill District,ka West Garo Hill, ka North Garo Hill bad ka South Garo Hills District.