Thung U Pope Francis, ïa u Rev. Gomes ha Sylhet diocese

Sylhet:Katkum ka jingïathuh jong ka Bangladesh Khasi Catholic Youth Association (BKCYA), U Kpa Bakhuid, u Pope Francis u la thung ïa u Most. Rev. Bishop Shorot Francis Gomes kum u Nongsharai mynsiem ne Bishop jong ka Jyllaniam Sylhet ne Sylhet Catholic Diocese ha ka 12 tarik, sngi Balang mynta u bnai.

Kum u Bishop ba lah shah jied, u Rev. Shorot Francis Gomes, u la shakri kum u Auxiliary Bishop jong ka Jyllaniambah Dhaka ne Dhaka Archdiocese naduh u snem 2016.

U Archbishop jong ka Dhaka Archdiocese bad u Apostolic Administrator jong ka Sylhet Diocese u Most. Rev. Bejoy N. D’Curze, OMI, u la pynbna ïa katei ka jingshah thung u Bishop Gomes hapoh Ïing Bishop, Sylhet ha jingdonlang ki Lyngdoh sohblei, ki riewniam Sister bad ki Brother na ki 8 tylli ki Parish kiba la sakhi ïa katei ka sngi kaba khraw.

Na ka liang jong ka Sylhet Catholic Diocese ka pynpaw ïa ka jingai khublei ïa u Bishop Gomes ba la shah jied bad pynpaw ka jingkyrmen ba U Mynsiem jong U Blei un ïai don ryngkat bad u Bishop baroh shi jingim jong u kum u Nongsharai mynsiem ka Balang Katholik hapoh Bangladesh, kane ka long katkum ka jingïathuh jong ka Bangladesh Khasi Catholic Youth Association (BKCYA).