Kiew kiba iap sha ka 72ngut, liem 7ngut ki snar ka Hamas, ha ka jinghiar tmar ka Israel sha Gaza

Ka jing ialeh thma, hapdeng ki ehrang Hamas bad ka Israel, kaba la sdang naduh ka Lah Sngi U Blei, ka la pyniap ia 72ngut ki briew, ba kynthup ia 16ngut ki khynnah. Katei ka dei ka jingkhein, kaba la ai, da ka United Nations.

Ka Gaza, kaba hap, hapoh ka jing pyniaid jong ka Palestine, ka kam, ba ki don 16ngut ki khynnah kiba iap, na 65ngut baroh, kiba la iap, ha ka jingshah ther bom, ha ki liengsuin iapom ka Israel.

Ki ehrang Hamas, ki pynbna, ba ki hynniew ngut ki snar jong katei ka kynhun, ki la shah siat iap, ha ki liengsuin iapom ka Israel, ba kynthup ruh ia U Bassem Issa, uba dei u heh duh jong katei ka seng.

Ha kawei pat ka khubor, U Ismail Haniyeh, uba dei sa uwei u heh jong ki Hamas, ula kren kob, da kaba ong “Lada ka Israel, ka kwah ia pyni bor, ngi la pynkhreh ia kata”.