2ngut,pang khieshoh sniang ha Assam

Guwahati, 2 Lber:
Ka khlam sniang kaba la khih puk ha ki katto katne ki bynta ka ri ha kine ki khyndiat sniang , ka la bam palat ki hajar tylli ki mynsiem haduh mynta , ha kaba la iathuh ba palat 1000 ngut ki briew ki la iap. Mynta pat katei ka jingpang sniang ka la poi sa sha ka jylla Assam ha kaba ha ka sngi saitjain jong ka taiew ba la dep, ar ngut na ki nong pang ki la pang jur naba ki la ioh ia kane ka jing pang. Kawei ka nongpang ka dei kaba dang 27 snem karta bad ka dei ka nongtrei jong ka Regional Medical Reserach Centre ha Dibrugarh district bad uwei pat u dei u rangbah ba la 50 snem karta uba na ka nongbah Guwahati.
La ong ba ka jingpang ba kitei ar ngut ki la ioh ka dei kaba la shim ba ka dei ka jingpang kaba la jur bha bad ka don ka H1N1 influenza A virus (Category A). Ia kitei ki nongpang la sumar ha ka jaka kaba kynjah kaba ym don mano manor uh ba iaid paidbah, namarba la shim ba lada pyntur shaba don ki paidbah katei ka jingpang ka lah ban ia bit sha kiwei pat. La bthah ia ki ba kin kiar na ka jingiakren bad ki briew bad ym shym la shah ba kin tur sha ki jaka paidbah.
Ki nongsumar ia kitei ki nongpang ki la iathuh ba haduh mynta kitei ki nongpang kim pat don ki dak ban pyni ba ki don ha ka jingma naba ki dang biang ka lyer ring mynsiem, kam shym la don ka jingpang shadem ne pynhiar kpoh , bad mynta ki la kham ioh bor. “Ki dang don hapoh ka jingpeit ki nongsumar, ngi la bthah ia ki ba kin pyntip mar mar lada jia ba ka don ka jingpang shadem, ka jingduh bor ban ring ne pynhiar mynsiem lane lada ka don ka jingpynhiar kpoh” ong u B C Bhagawati, u khliehduh jong ka Integrated Disease Surveillance Programme.
Ban pynthikna shuh shuh ioh ka dei ka H1N1 , U Principal Secretary, ka koit ka khiah u Sanjeeva Kumar u la khot ia ka jingialang kyrkieh ba mynta ka sngi , ban wad ia ka daw, hynrei la ioh jingtip ba uwei na ki nongpang u dei uba la wan na Allahabad sha ka jylla Assam ha ka 23 tarik u rymphang. Ia katei ka jingpang la ioh nyngkong da utei u rangbah uba la wan na Allahabad, hynrei ka la pur pat sha ka nongtrei kaba dei ban test ia kitei ki jait jingpang. Ka la pyntip sha kiba halor ba ka dei katei ka jait jingpang ha ka sngi thohdieng jong ka taiew ba la dep.