“Ki pulit kim nud kem ia ki myntri bamsap, nion ia kiba rit”

Shillong, 2 Lber:
Ka jingpjah slam ka bamsap ha ka thung nonghikai LP Skul, kala pynlong ia ka CSWO ban ther kylla ia ki pulit kiba tieng kap kap ia ki myntri sorkar ban tohkit hynrei ki nion ia kiba duk kiba rit tang shu bakla khyndiat ruh.
Haba iakren bad u Rupang ha kane ka sngi Thohdieng, ka President ka CSWO ka Kong Agnes Kharshiing ka la ong ba kita ki pulit kiba kam kum ki stad, ki jah jlam bad kim don ban tohkit ban iaid shakhmat haba lap ia ka jingbamsap ki myntri sorkar. “Kaei kane, hato ki myntri sorkar ki kham long halor ia ka ain, balei ki pulit kim nud ban tohkit bad ban pynngat kam ia ki myntri sorkar”, la ong bad ka la bynrap, lada leh bakla uba rit tang hyndiat, la shah pynshitom haduh ban suhsat.
“Ngi la ujor ejahar la bun hynrei ki pulit kim leh eiei ia ka jingbamsap sialieh ha ka tnad pule puthi”, la ong ka Kong Kharshiing.
Katkum ka jingong ka President ka CSWO, kaba sngew lyngngoh ka long ba ki pulit ki leh kum bym nang haba ki dei ki nongpyntreikam ia ka ain.
Lah ban kdew ba ka myntri ka pule puthi barim ka jylla ka Kong Ampareen Lyngdoh bad ki ophisar ki la shah kynnoh ba ki la leh beain ha ka rukom thungkam ia ki nonghikai skul LP jong ka sorkar ha ka jylla, ha kaba ki kandidet ki la shah pyndam ia ki mark jongki da ka sia lieh bad ban pynheh mark ia kiba ioh rit.
Kane ka kam ka la paw pyrthei lyngba ka jinglap ka CBI bad ka la poi ruh sha iing lieh iingsaw hynrei haduh mynta, kam pat ioh kano kano ka jingmih.