Ki dawai covid, kiba don mynta, kin dap tang 1 taiew, ong u myntri

Shillong:U Myntri ba dei khmih ia ka tnad ka koit ka khiah ha ka jylla, U Bah AL Hek u la iathuh ba ka jylla hi mynta ka don sa kumba 80 hajar tylli ki dawai injek tika Covid 19, ia kiba dei ban ai sha kiba la don 45 snem ka rta shaneng, katba 42 hajar tylli ki dawai injek tika la khmih lynti ba kin wanpoi lashai ka sngi ka 12 tarik u Jymmang 2021.

U Bah AL Hek u la ong ba kine ki 80 hajar tylli ki injek, kin dap tang na ka bynta 7 ne 8 sngi eiei, namar ka sorkar ka buh thong ban ai injek haduh kumba 10 hajar ngut shisngi, hynrei u la tip ruh ba na ka liang ka Sorkar ka la pan shuh shuh ia ki dawai na ka Sorkar pdeng bad ia kaba mynta ka dang ap ia ka jubab namar katkum ka jingiathuh jong u Chief Secretary, ka Sorkar India kan phah lang ia ki dawai sha baroh ki jylla jong ka Ri India.
U Bah Hek u la iathuh ruh ba kine ki 42 hajar tylli ki dawai injek, ki ban poi lashai ka sngi yn sdang ban ai ia ki nongshong shnong kiba naduh ka 18 snem haduh ka 44 snem ka rta bad na ka liang u Bah Hek u la ong ba ka Sorkar kan sa iakren biang ha ka jingialang ba kumno yn ai ia ki injek tika.