Byrngem ia khih, lada ym kynriah ia u SDO Amlarem

Shillong, 1 Lber:
Ka JYF-WJR ka la ther tyngeh ia u SDa ( Civil) ka Amlarem Sub-Division ha ka ba ka la kynnoh ba utei u SDO u la ailad ia ki mynder ri ban bsuh khlieh jubor ha Amlarem SubDivision bad ban ioh ia ki bhah kumba ioh ki nongshong shnong katei ka thain. Na ka liang katei ka Seng ka la ong ba kam lah ban pdiang ia ka ne ka jingleh bymsuidniew bad leh shiliang khmat u Ghanshyam Dass (IAS) ba dei SDO Civil Sub Division, Amlarem ia ki riew pawkhmat bad ki nong shong shnong ka thain hi baroh kawei, kaba la long ka jingiuhroit ia ka hok bad ka bhah jong ki trai Ri trai muluk ban ioh bhah lang ha ki mar rashon kumba la leh baroh shikatta.
Ka la kynnoh ba ka jingioh lad ki Mynder Ri bad bar Jylla ban ioh rung tuh khlem ki kot ki sla kiba lah ban pynshisha ba na ei ki wan bad shano kin leit ka long ka lad kamai shimet jong ki riew shim kabu kiba don ha ka bor ban kamai beain bad kdup ieit ia ki khar tuh khar iong kiba wan na Bangladesh ban wan ia knieh kam bad ki trai Ri trai muluk hapoh Civil Sub Division, Amlarem kynnoh u Ialam G Syngkrem Secretary ka JYF-WJR.
“Ka jingleh shi liang khmat u Ghanshyam Dass (IAS) ba dei SDO, Civil Sub Division, Amlarem da kaba ailad ia ki Bar Ri Bar Jylla ban ioh rung kyrteng ha ka Electoral roll jong ka Sorkar Jylla ka don ka ei re ka ei ka ha lyndet ka ban wanrah jingma ia ka lawei jong ka thain” ong biang ka kyrwoh. Ka la kynnoh ruh ba ka jingioh syrnod jaka shong jaka sah ki bar jylla ka dei lyngba ka hukum jong u SDO, bad ka la ka ba ka dei ka kam bym khein snep shuh ia ka iktiar ki Rangbah shnong kiba dei ki nongsynshar shnong ba trei mon sngewbha kiba iarap ha ka ban pyniaid shakhmat ia ki kam kiba ia dei bad ka sorkar Jylla lyngba ki tnad bapher bapher hapoh West Jaintia Hills District.
Shuh shuh ka JYF-WJR ka pynrem jur ia ka ne ka jingleh meng leh sarong une u SDO da kaba lehbor ia ki paidbah ka thain bad khamtam ia ka jingleh bymsuidniew ia ki Rangbah Shnong ka thain ka la pynbitar bad pyndukha mynsiem bad ka la byrngem ba lada ka sorkar kam pynkynriah mardor ia u Ghanshyam Dass (IAS) ba dei SDO, Civil Sub Division, Amlarem kin iakhih pyrshah da kaba kyrshan tyngeh ia ka jingdawa jong Synjuk Rangbah Shnong Amlarem, KSU, Bakur Dawki Unit bad ka HNYF Southern Riwar Circle ong u tei u nongialam ka JYF-WJR.